پرەزيدەنت دۋشانبەدە وتەتىن ورتالىق ازيا ەلدەرى باسشىلارىنىڭ سامميتىنە قاتىسادى
«كەلىسسوز اياسىندا وزەكتى وڭىرلىك جانە جاھاندىق پروبلەماتيكاعا قاتىستى جەمىستى پىكىر الماسۋ ءوربىدى. حالىقارالىق ارەناداعى ۇستانىمدارىمىزدىڭ جاقىندىعى، كوپجاقتى الاڭداردا ورتاق مۇددەلەردى ىلگەرىلەتۋگە دايىن ەكەنىمىز ايتىلدى. ءبىز ورتالىق ازيا وڭىرىندە تۇراقتىلىق پەن قاۋىپسىزدىكتى قامتاماسىز ەتۋ ماسەلەلەرىنە جەكە توقتالدىق. وسى تۇرعىدا اۋعانستانداعى قازىرگى جاعدايدى تالقىلادىق»، - دەدى پرەزيدەنت.
قاسىم-جومارت توقايەۆ ورتالىق ازيانىڭ تۇراقتى دامۋى وسى ايماقتاعى بارلىق باۋىرلاس حالىقتاردىڭ مۇددەلەرىنە ساي ەكەنىن اتاپ ءوتتى.
«وسى تۇرعىدا ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋلەرى فورماتىنداعى تىعىز ءوزارا ءىس- قيمىلدى ءارى قاراي جالعاستىرۋعا كەلىستىك. وسى مۇمكىندىكتى پايدالانا وتىرىپ، دۋشانبەدە وتەتىن ايماق ەلدەرى كوشباسشىلارىنىڭ سامميتىنە قاتىساتىنىمدى راستاپ، تاجىكستاننىڭ قۇرمەتتى پرەزيدەنتىنە وسى شاقىرۋى ءۇشىن العىس بىلدىرگىم كەلەدى»، - دەدى مەملەكەت باسشىسى.
ايتا كەتەيىك، كەشە پرەزيدەنت قاسىم-جومارت توقايەۆ قازاقستانعا مەملەكەتتىك ساپارمەن كەلگەن تاجىكستان پرەزيدەنتى ەمومالي راحموندى ەلوردا اۋەجايىندا قارسى العان بولاتىن.
بۇگىن تاجىكستان پرەزيدەنتى ەمومالي راحمونوۆ مەملەكەت باسشىسى قاسىم-جومارت توقايەۆپەن اقوردادا وتكەن كەڭەيتىلگەن قۇرامداعى كەلىسسوز كەزىندە بيىل قازاقستان تاجىكستاننىڭ نەگىزگى ساۋدا سەرىكتەسىنە اينالۋى مۇمكىن ەكەنىن ايتتى.
