قازاقستاننىڭ بانك سەكتورى تاجىكستان نارىعىنا قىزىعۋشىلىق تانىتىپ وتىر - توقايەۆ
«ءبىز اۋىل شارۋاشىلىعى ونىمدەرىن ءوندىرۋ، قايتا وڭدەۋ جانە ساقتاۋ باعىتتارىندا بىرلەسكەن كاسىپورىندار قۇرۋدىڭ كەلەشەگىن قاراستىرۋعا كەلىستىك. سول ۋاعدالاستىقتاردى ءتيىمدى جانە ۋاقتىلى ىسكە اسىرۋ ءۇشىن 2025-جىلعا دەيىن اۋىل شارۋاشىلىعى سالاسىنداعى ىنتىماقتاستىقتى جانداندىرۋ جونىندەگى جول كارتاسىنا قول قويىلدى. جاھاندىق تۇراقسىزدىق اياسىندا اتالعان شارالار مەملەكەتتەرىمىزدىڭ ازىق-تۇلىك قاۋىپسىزدىگىن قامتاماسىز ەتۋگە ماڭىزدى ۇلەس قوسادى. سونىمەن قاتار، ىسكەرلىك بايلانىستار مەن ەكونوميكالىق كووپەراتسيانى كەڭەيتۋ ءۇشىن نەعۇرلىم قولايلى جاعدايلار جاساۋ قاجەتتىلىگى اتاپ ءوتىلدى. وسىعان بايلانىستى ءوڭىرارالىق فورۋمدار فورماتىندا ەكىجاقتى ءوزارا ءىس-قيمىلدىڭ باستالۋى ەرەكشە ماڭىزعا يە»، - دەدى قاسىم-جومارت توقايەۆ.
مەملەكەت باسشىسى بۇگىن ەكى ەلدىڭ قالالارى مەن اۋداندارى اراسىنداعى باۋىرلاستىق بايلانىستاردى دامىتۋ تۋرالى قول قويىلعانىن ەسكە سالدى.
«ەكى مەملەكەت ءۇشىن دە IT سەكتور مەن قارجى سالاسىنداعى ىنتىماقتاستىقتىڭ كەلەشەگى زور. ءبىزدىڭ ەلدىڭ مەملەكەتتىك قىزمەتتەردى سيفرلاندىرۋ مەن IT تەحنولوگيالاردى دامىتۋدا ەلەۋلى تاجىريبەسى بار. وسىعان بايلانىستى، قازاقستان تاجىكستانمەن كەيبىر دامىعان سيفرلىق شەشىمدەر مەن اقپاراتتىق جۇيەلەردى بولىسۋگە دايىن.
قازىرگى تاڭدا قازاقستاننىڭ بانك سەكتورى تاجىكستاننىڭ قارجى نارىعىنا قىزىعۋشىلىق تانىتىپ وتىر. وسى تاقىرىپتا كەلىسسوزدەر جۇرگىزىلىپ جاتىر. ءبىز تاجىكستاندىق سەرىكتەستەرىمىزدى اتالعان باعىتتاردىڭ بارلىعى بويىنشا بىرلەسكەن جوبالاردى ىسكە اسىرۋعا شاقىرامىز»، - دەدى مەملەكەت باسشىسى.
ايتا كەتەيىك، كەشە مەملەكەت باسشىسى قاسىم-جومارت توقايەۆ قازاقستانعا مەملەكەتتىك ساپارمەن كەلگەن تاجىكستان پرەزيدەنتى ەمومالي راحموندى ەلوردا اۋەجايىندا قارسى العان بولاتىن.
بۇگىن تاجىكستان باسشىسى ەمومالي راحمونوۆ ق ر پرەزيدەنتى قاسىم-جومارت توقايەۆپەن اقوردادا وتكەن كەڭەيتىلگەن قۇرامداعى كەلىسسوز كەزىندە بيىل قازاقستان تاجىكستاننىڭ نەگىزگى ساۋدا سەرىكتەسىنە اينالۋى مۇمكىن ەكەنىن ايتتى.
ە. راحموننىڭ استاناعا ساپارىنىڭ اياسىندا 9 قۇجاتقا قول قويىلدى.
