الاكولگە تۋريستەردى تارتۋ بويىنشا جول كارتاسى دايىندالدى
تۋريستەردى تارتۋ جانە قىزمەت كورسەتۋ دەڭگەيىن ارتتىرۋ ءۇشىن كول جاعالاۋىن دامىتۋدىڭ جول كارتاسى ازىرلەنىپ جاتىر.
وبلىس اكىمىنىڭ ءبىرىنشى ورىنباسارى ايدىن كارىموۆ اتاپ وتكەندەي، جول كارتاسى تۋريستەرگە قولايسىزدىق تۋعىزاتىن ينفراقۇرىلىم، ەكولوگيا، دەمالۋشىلاردىڭ قاۋىپسىزدىگى جانە باسقا دا ماسەلەلەردى كەزەڭ- كەزەڭىمەن شەشۋ بويىنشا 40 ءىس-شارانى كوزدەيدى.
«ءۇرجار اۋەجايىنىڭ جارىق سيگنال بەرۋ جابدىعى، بەينەباقىلاۋ، سىرتقى جارىقتاندىرۋ جۇيەسىن قايتا جاڭارتۋ اياقتالۋعا جاقىن. اۋەجاي تەرمينالىنا رەكونسترۋكسيا جاساۋ بويىنشا جوبالاۋ-سمەتالىق قۇجاتتاما (ج س ق) ازىرلەندى، جوبا مەملەكەتتىك ساراپتامانىڭ قاراۋىندا. بۇگىنگى تاڭدا «الماتى- ءۇرجار- سەمەي- ءۇرجار- الماتى» باعىتتارى بويىنشا رەيستەر اپتاسىنا ەكى رەت ورىندالادى»، - دەدى ايدىن كارىموۆ.
سونداي-اق اكىمنىڭ ءبىرىنشى ورىنباسارى بيىلعى ماۋسىمنان تامىزعا دەيىن رەيستەردىڭ جيىلىگى اپتاسىنا 3-4 رەتكە دەيىن ارتاتىنىن اتاپ ءوتتى.
بۇدان بولەك، 15-مامىردان باستاپ استانادان ءۇرجارعا تىكەلەي ۇشاق قاتىناي باستايدى.
«ءورت قاۋىپسىزدىگىن قامتاماسىز ەتۋ ءۇشىن قابانباي اۋىلىندا 2 تەحنيكاعا ارنالعان ءورت دەپوسىن سالۋعا جسق ازىرلەۋ باستالدى. جوبانى ىسكە اسىرۋ وبلىستى دامىتۋدىڭ 2024 -جىلعا ارنالعان كەشەندى جوسپارى شەڭبەرىندە دايىندالدى. 2027 -جىلعا دەيىن جاڭا ايماقتاردى قوسا العاندا، كولدى جاعالاۋدى نىعايتۋ بويىنشا جۇمىستار كەزەڭ-كەزەڭىمەن جۇرگىزىلەتىن بولادى»، - دەدى ايدىن كارىموۆ.
