14:06, 04 - مامىر 2023 | GMT +5
الماتىدا «قارا شاپان» ءمۇسىنى ورناتىلدى
الماتى. قازاقپارات - الماتىدا «قارا شاپان» ەرەكشە ارت-نىسانى ورناتىلدى، دەپ حابارلايدى قازاقپارات ءتىلشىسى.
قالا اكىمدىگى باسپا ءسوز قىزمەتىنىڭ مالىمەتىنشە، «قارا شاپان» ءمۇسىنىن قازاقستاندىق سۋرەتشى سىرلىبەك بەكبوتايەۆ جاسادى. ءۇش مەترلىك شاپان كۇيدىرىلگەن مەتالدان ءورىلىپ جاسالعان. سالماعى - جارتى توننا، ديامەترى - 3,5 مەتر.
اۆتوردىڭ ايتۋىنشا، بۇل ءمۇسىن كەزدەيسوق تاڭدالماعان، شاپان - مادەني كود. ول قازاق جانە ورتالىق ازيا مادەنيەتىنە باعىتتايدى، وندا كوشپەندىلەر قۇرمەت، بىرلىك جانە ءوزارا تۇسىنىستىك سيمۆولى رەتىندە شاپانمەن الماسقان.
الماتى اكىمدىگىنىڭ قولداۋىمەن سۋرەتشىنىڭ شىعارماشىلىق يدەياسىن جۇزەگە اسىرۋعا مەتسەناتتار كومەكتەسكەن.
قالانىڭ جاڭا ارت-نىسانىن پانفيلوۆ پەن قابانباي باتىر كوشەلەرىنىڭ قيىلىسىنان كورۋگە بولادى.
