جيگۋلي دايرابايەۆ: وتستاۆكاعا كەتكەننەن گورى قازاق حالقىنا پايدام كوپ تيەدى
ءماجىلىس كۋلۋارىندا جۋرناليستەر دەپۋتاتتان بالالارى ءۇشىن نەگە كەشىرىم سۇرامايتىنىن بىلگىسى كەلدى.
«ماعان قوياتىن كىناڭىز بولسا، سونى ايتىڭىز، سول ءۇشىن كەشىرىم سۇرايمىن. بالالار ءوز تىرلىگىنە وزدەرى جاۋاپ بەرەدى. ايىپ ەتپەڭىزدەر»، - دەدى ج. دايرابايەۆ.
تىلشىلەر «بالالارىڭىزعا ناشار تاربيە بەردىڭىز بە؟» دەگەن سۇراق قويدى.
«ونى ۋاقىت كورسەتەدى، الدىن الا ساۋەگەيلىك جاساي المايمىن. قۇقىق قورعاۋ ورگاندارى وزدەرى شەشەدى. سوتتىڭ جۇمىسىنا مەن ارالاسا المايمىن»، - دەپ جاۋاپ بەردى دەپۋتات.
ءسوز سوڭىندا شەتەلدە وسىنداي جاعداي بولسا، لاۋازىمدى تۇلعالار وتستاۆكاعا كەتەتىنى ايتىلىپ، ج. دايرابايەۆتىڭ دەپۋتاتتىق مانداتتى نەگە تاپسىرمايتىنى سۇرالدى.
«مەن وتستاۆكاعا كەتكەننەن گورى قازاق حالقىنا وزدەرىڭ سياقتى پايدام كوپ تيەدى. اۋىل شارۋاشىلىعىن دامىتامىز»، - دەدى ول.
بۇدان بۇرىن حابارلانعانداي، تاراز قالاسىنىڭ سوتى الاياقتىق جاسادى جانە ءىرى مولشەردە اقشا جىمقىردى دەپ ايىپتاپ، ۇكىم شىعارعان ەكى كۇدىكتىنىڭ ءماجىلىس دەپۋتاتى جيگۋلي دايرابايەۆتىڭ ۇلدارى ەكەنى بەلگىلى بولدى.
ماجىلىستەگى «اۋىل» پارتياسى فراكسياسى دەپۋتاتى جيگۋلي دايرابايەۆ مانداتىن تاپسىرمايتىنىن مالىمدەدى.
بىرنەشە كۇننەن بەرى الەۋمەتتىك جەلىدە ج. دايرابايەۆتىڭ تۇرعىن ءۇي جانە جەر ماسەلەسىنە قاتىستى داۋلارعا قاتىسى تۋرالى اقپارات تاراي باستادى. بۇگىن دەپۋتات جەلىدە تاراعان ايىپتاۋلارعا جاۋاپ بەردى.
