دەپۋتاتتار شەتەلدىك كولىكتەردى زاڭداستىرۋ ۋاقىتىن ۇزارتۋدى ۇسىندى
«2022-جىلى 1- قىرقۇيەكتە مەملەكەت باسشىسى قاسىم-جومارت توقايەۆ ءوز جولداۋىندا ەلىمىزگە زاڭسىز كىرگەن اۆتوكولىكتەردى تىركەۋ تۋرالى ءبىرجولعى شەشىم جاساۋدى ۇسىندى. 2023-جىلى ۇكىمەت قاۋلىسىمەن 2022-جىلى 1- قىركۇيەككە دەيىن ەل اۋماعىنا اكەلىنگەن كولىكتەردىڭ جەكەلەگەن ساناتتارىن باستاپقى تىركەگەنى ءۇشىن الىم مولشەرلەمەسى مەن ۋتيليزاتسيالىق الىمىن 200 مىڭ تەڭگە كولەمىندە بەكىتتى. وعان قوسا كولىك باسقا مەملەكەتتىڭ ىزدەۋىندە بولماۋى جانە كەدەندىك تازالاۋدان ءوتۋى شارت بولدى. قازىر ءبىزدىڭ كوتەرىپ وتىرعان ماسەلەمىز ەل اۋماعىنا 2022-جىلدىڭ 1- قىركۇيەگىنەن كەيىن كىرگەن 80 مىڭعا جۋىق كولىكتىڭ تاعدىرى جايىندا بولماق»، - دەدى دەپۋتات ناۋرىز سايلاۋباي ءماجىلىستىڭ بۇگىنگى وتىرىسىندا.
ونىڭ ايتۋىنشا، حالىق شەتەلدىك ماشينالاردى جىلى جاڭا، ساپاسى جوعارى، باعاسى دا ءتيىمدى بولعاندىقتان جاپپاي الىپ جاتىر.
«وزدەرىڭىز بىلەتىندەي، ءبىزدىڭ ەلدە 30 جىل جۇرگەن ەسكى كولىكتىڭ باعالارى شارىقتاپ تۇر. مىسالى، 2-3 جىل بۇرىن «Toyota Camry 20» اۆتوكولىگى 2 ميلليون تەڭگە تۇرسا، قازىر 4 ميلليون تەڭگەگە جەتتى. سەبەبى ساتىپ العان ەسكى كولىكتىڭ باعاسى جىل سايىن قىمباتتاۋدا. ال وزىمىزدەن قۇراستىرىلىپ شىققان اۆتوكولىكتەر قاراپايىم تۇرعىندارعا قولجەتىمسىز، باعاسى ساپاسىنا ساي كەلمەيدى. شەتەلدەن رەسمي تۇردە ساتىپ الايىن دەسە ۋتيليزاتسيالىق الىم مەن باستاپقى تىركەۋ الىمى كولىك باعاسىنان دا اسىپ جاتىر. سوندىقتان ازاماتتارىمىز ءالى كۇنگە دەيىن كورشى ەلدەردەن كولىكتەردى كىرگىزىپ جاتىر. ولاردىڭ سانى كۇن سايىن ارتىپ، الداعى ۋاقىتتا تاعى ۇلكەن ماسەلەگە اكەپ سوعۋى ابدەن مۇمكىن»، - دەدى ن. سايلاۋباي.
وسىعان بايلانىستى ناۋرىز سايلاۋباي پرەمەر-ءمينيستردىڭ ءبىرىنشى ورىنباسارى رومان سكليارعا ساۋال جولدادى.
«2022-جىلدىڭ 1- قىركۇيەگىنەن كەيىن شەتەلدە تىركەلگەن كولىكتەردى ايداعان قازاقستان ازاماتتارىنا ەلىمىزدىڭ شەكاراسىنا كىرۋگە نەگە رۇقسات بەرىلدى؟ پرەزيدەنت جولداۋىندا زاڭسىز كولىك اكەلەتىن امال-ءتاسىلدىڭ بارىنە توسقاۋىل قويۋ ءۇشىن باتىل شارالار قابىلداۋ قاجەت دەدى. سىزدەردىڭ تاراپىڭىزدان توسقاۋىل قويۋ ءۇشىن قانداي شارالار قابىلداندى؟ شەكارامىزدان وتكەن شەتەلدە تىركەلگەن اۆتوكولىكتەردىڭ قانشاسى مەملەكەتتىك تىركەۋدەن وتە المادى جانە ولاردىڭ تاعدىرى نە بولماق؟»، - دەپ سۇرادى دەپۋتات.
سونىمەن قاتار جالپىۇلتتىق سوتسيال-دەموكراتيالىق پارتياسى شەتەلدە تىركەلگەن كولىكتەردى زاڭداستىرۋ ۋاقىتىن، شەكارامىزدان زاڭسىز كىرەتىن كولىكتەردى وتكىزبەۋدىڭ امالدارىن تاۋىپ، ناقتى شارتتارىن بەكىتكەنشە ۇزارتۋدى ۇسىندى.
«جوعارىدا اتالعان ماسەلەنى ەسكەرە وتىرىپ، بۇل كولىك يەلەرىنىڭ اراسىندا جالعىز باستى انالار، كوپبالالى جانە مۇمكىندىگى شەكتەۋلى بالا اسىراپ وتىرعان وتباسىلار، مۇمكىندىگى شەكتەۋلى جاندار مەن جاسى 35 كە دەيىنگى جاستار بار ەكەنىن ەسكەرە وتىرىڭىزدار»، - دەيدى ج س د پ وكىلى.
