سولتۇستىككە قونىس اۋدارعاندارعا ساپاسىز باسپانا بەرىلىپ جاتىر - داۋلەت مۇقايەۆ

استانا. قازاقپارات - ءماجىلىس دەپۋتاتى داۋلەت مۇقايەۆ سولتۇستىككە قونىس اۋدارۋشىلاردى قولداۋ ماسەلەلەرىن كوتەردى.

بۇل جونىندە دەپۋتات پرەمەر-ءمينيستردىڭ ءبىرىنشى ورىنباسارى رومان سكليار مەن ورىنباسارى التاي كولگىنوۆكە ساۋال جولدادى، دەپ حابارلايدى قازاقپارات.

«قۋاتتى وڭىرلەر - ەلدى دامىتۋدىڭ درايۆەرى» ۇلتتىق جوباسىن ىسكە اسىرۋ شەڭبەرىندە 2022-جىلى سولتۇستىككە 7923 ادام قونىس اۋدارعان. ولاردىڭ 1320 سى قانداس جانە 6603 ءى ىشكى قونىس اۋدارۋشىلار بولعان. ال بيىل 8652 ادامعا كۆوتا بولىنگەن. 2021-2025-جىلدارعا بۇل باعدارلاماعا 46,7 ميلليارد تەڭگە بولىنسە دە وڭ ناتيجەسىن بەرمەي وتىر. سەبەبى كوشىپ بارعاندار كوپ ۇزاماي ءوز ايماقتارىنا قايتادان كوشىپ جاتىر»، - دەدى دەپۋتات ءماجىلىستىڭ بۇگىنگى وتىرىسىندا.

ونىڭ ايتۋىنشا، سولتۇستىك قازاقستان وبلىسىنىڭ وزىندە-اق ميگراتسيا سالدوسى تەرىس مانگە يە. سوڭعى جىلدارى وڭتۇستىك ايماقتان كوشىپ كەلگەن 600 ادام بۇل وبلىستان قايتا كوشىپ كەتكەن. ولاردىڭ سانى جىل ساناپ ارتۋدا.

«قونىس اۋدارعان وتباسىلارعا تۇرعىن ءۇي ساتىپ الۋعا ءۇي قۇنىنىڭ %50، ءبىراق 4 ميلليون تەڭگەدەن اسپايتىن سومادا قارجى بەرىلەدى. بۇل - قونىس اۋدارۋشىلارعا ۇلكەن كومەك. ايتسە دە، ۇكىمەت تاراپىنان سالعان باسپانانىڭ ساپاسىزدىعىنا ارىزدانعان جاندار وتە كوپ. جاڭادان سالىنعان ۇيلەردىڭ ساپاسىز ەكەنىن ەسكەرىپ، مەملەكەتتىك باعدارلاما اياسىندا ەكىنشى دەڭگەيلى نارىقتان تۇرعىن ءۇي ساتىپ الۋ نەمەسە وزدەرىنە ءۇي سالۋ مۇمكىندىگىن قاراستىرۋدى ۇسىنامىن»، - دەدى د. مۇقايەۆ.

سونىمەن بىرگە، دەپۋتات اۋا رايى مەن قونىس اۋدارۋشىلاردىڭ اداپتاتسيالىق كەزەڭىن ەسكەرە وتىرىپ، قونىس اۋدارۋدى تەك ەرتە كوكتەمدە جۇرگىزۋدى ۇسىندى.

«قونىس اۋدارعان اعايىنعا جات جەردىڭ تىنىس-تىرشىلىگىنە ۇيرەنۋگە جاردەمشى بولاتىن ارنايى بەيىمدەۋ ورتالىعى مەن بىرەگەي سايت، جەدەل جەلى تەلەفونى ىسكە قوسىلۋى كەرەك. سەبەبى قونىس اۋدارۋشى قانداستارىمىزدىڭ كوبى كيريلل قارىپتەرىن وقىعاندا قينالعاندارى بايقالادى. ال ءوزىمىزدىڭ جەرگىلىكتى حالىق بولسا كوشى-قون جايلى تولىق اقپارات بىلە بەرمەيدى. سەبەبى اقپاراتتاندىرۋ، تۇسىندىرمە جۇمىستارى وتە از. قونىس اۋدارۋشىلاردى ارنايى كوميسسيا نەگىزىندە ىرىكتەپ، كاسىپكە يكەمى بار، كوپبالالى وتباسىلارعا باسىمدىق بەرىلۋى كەرەك. كوشكەن سوڭ تۋعان ءار سابيگە دە بەرىلەتىن جاردەماقى دەڭگەيىن ارتتىرۋ دەموگرافياعا سەرپىن بەرەرى ءسوزسىز»، - دەدى سپيكەر.

جۇمىس ورىندارىن كوبەيتۋ ماقساتىندا جۇمىس بەرۋ مۇمكىندىگى بار كاسىپكەرلەردى كوشىرۋگە ىقپال ەتۋ نەمەسە جاس كاسىپكەرلەردى قىزىقتىراتىن ارنايى وڭىرلىك باعدارلاما ازەرلەۋ كەرەگى دە ايتىلدى.

«قونىس اۋدارعانداردىڭ كاسىبىن دوڭگەلەتىپ اكەتۋگە 2,5 پايىزبەن بەرىلەتىن جەڭىلدەتىلگەن نەسيەلەر سانىن ارتتىرىپ، سۋبسيديالار، گرانتتاردى ۇلعايتۋ كەرەك. التاي سەيدىر ۇلى، بيىل حالىقتى وڭتۇستىكتەن سولتۇستىككە كوشىرۋ ءۇشىن قانداي وزگەرىستەر مەن تولىقتىرۋلار ەنگىزىلدى؟ قونىس اۋدارۋ جۇمىستارى مەن اقپاراتتاندىرۋ قانداي جوسپاردا ءجۇرىپ جاتىر؟ جوعارىدا ايتقان ۇسىنىستاردى ەسكەرىپ، جاۋاپتى زاڭنامادا بەلگىلەنگەن مەرزىمدە جازباشا ۇسىنۋىڭىزدى سۇرايمىن»، - دەدى داۋلەت مۇقايەۆ.