گەيدار اليەۆ جانە تۇركى الەمى: استانادا حالىقارالىق كونفەرەنسيا ءوتتى
كونفەرەنسيانى تۇركى اكادەمياسى جانە تۇركى مادەنيەتى مەن مۇراسى قورى ۇيىمداستىردى. شارادا العاش بولىپ ءسوز العان اكادەميا پرەزيدەنتى شاحين مۇستافايەۆ گەيدار اليەۆتىڭ ازەربايجاننىڭ مەملەكەتتىگى مەن تۇركى الەمىنىڭ عاسىرلار بويعى تاريحىنداعى بىرەگەي تۇلعا ەكەنىن اتاپ ءوتتى.
«تاريح - ۇلى ادامداردىڭ يدەيالارى مەن ىستەرىنە نەگىزدەلگەن. گەيدار اليەۆتىڭ ەسىمى قازىرگى ازەربايجاننىڭ، ونىڭ تاۋەلسىزدىگى مەن باسەكەگە قابىلەتتى مەملەكەت رەتىندە تابىستى دامۋىنىڭ سيمۆولىنا اينالدى. گەيدار اليەۆ حالىقتارىمىزدى بىرىكتىرۋ جانە جاقىنداستىرۋ ءۇشىن زور كۇش جۇمسادى»، - دەدى تۇركى اكادەمياسىنىڭ پرەزيدەنتى شاحين مۇستافايەۆ.
ول سونداي-اق، گەيدار اليەۆتىڭ ازەربايجان مەن قازاقستان اراسىنداعى تىعىز قارىم-قاتىناس، سىندارلى جانە ءوزارا ءتيىمدى ىنتىماقتاستىق ورناتۋ جولىنداعى ەڭبەگىنە توقتالدى.
ال، اقپارات جانە قوعامدىق دامۋ ءمينيسترى دارحان ءقىدىرالى گەيدار اليەۆتىڭ 100 جىلدىعىنا وراي دەرەكتى فيلم مەن باسقا دا جاريالانىمدار شىعىپ جاتقانىن ايتىپ ءوتتى.
«جاقىندا ەكى ەل پرەزيدەنتتەرىنىڭ كەزدەسۋىندە مەملەكەت باسشىسى قاسىم-جومارت توقايەۆ گەيدار اليەۆتىڭ ازەربايجان حالقىنىڭ ناعىز برەندى ەكەنىن اتاپ ءوتتى. ول ەكى حالىقتى بايلانىستىراتىن كوپىر سياقتى. وسى كۇنگە وراي، ۇلى تۇلعاعا ارنالعان فيلم ازىرلەندى. سونىمەن قاتار، ءبىزدىڭ اقپاراتتىق پورتالدارىمىزدا گەيدار الييەۆتىڭ ەڭبەگىنە قاتىستى ماتەريالدار جاريالاندى. ايتا كەتۋ كەرەك، جاقىندا اشىلعان گەيدار اليەۆ اتىنداعى كوشە باۋىرلاس ەلدەرىمىزدى ودان ءارى جاقىنداستىردى»، - دەدى مينيستر.
كونفەرەنسيا اياسىندا «Qazaqstan» تەلەارناسى دايىنداعان گەيدار اليەۆتىڭ ءومىرى مەن ەڭبەگى تۋرالى «عازيز عۇمىر» دەرەكتى فيلمى قاتىسۋشىلار نازارىنا ۇسىنىلدى.
ەسكە سالا كەتەيىك، 10- ساۋىردە مەملەكەت باسشىسى قاسىم-جومارت توقايەۆ پەن ازەربايجان پرەزيدەنتى يلحام اليەۆ استانانىڭ ورتالىعىنداعى گەيدار اليەۆ اتىنداعى كوشەنى سالتاناتتى تۇردە اشقان بولاتىن.
