پياز وندىرۋشىلەردىڭ جارتى ءونىمىنىڭ ءشىرىپ كەتكەنى جالعان - مينيسترلىك

استانا. قازاقپارات - ساۋدا جانە ينتەگراتسيا مينيسترلىگى «پياز ەكسپورتىنا تىيىم سالۋ سالدارىنان ءونىمنىڭ جارتىسى ءشىرىپ كەتتى» دەگەن اقپاراتتى جوققا شىعاردى، دەپ حابارلايدى قازاقپارات ءتىلشىسى.

«وتكەن جىلى ەلىمىزدە 1 ميلليون 100 توننا پياز ءوندىرىلدى. ونىڭ ىشىندە 900 مىڭ توننا پياز ەكسپورتتالدى. وتكەن اپتادا پياز وندىرۋشىلەرمەن كەزدەسىپ، قانشا ءونىم قالعانىن سۇرادىم. ولاردىڭ مالىمەتىنە سايكەس، 100 مىڭ توننا پياز قالدى. سوندىقتان، «وتاندىق وندىرۋشىلەردىڭ پيازى ءشىرىپ كەتتى، دالاعا تاستالدى» دەگەن جالعان اقپارات»، - دەدى ساۋدا جانە ينتەگراتسيا ءبىرىنشى ۆيتسە-ءمينيسترى ارمان شاققاليەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ودان ءارى پياز ەكسپورتىنا قاتىستى ساۋدا جانە ينتەگراتسيا مينيسترلىگى ساۋدا كوميتەتى ءتوراعاسىنىڭ مىندەتىن اتقارۋشى ايدار ابىلدابەكوۆ تولىقتىردى.

«مەن بيىل اقپاندا پياز ءوندىرۋشى ەكى ءىرى كاسىپورىنعا باردىم، ولار - جامبىل وبلىسىنداعى قورداي جانە شۋ اۋدانىندا. قويمالاردا %80-90 پياز بولدى، اراعا ءبىر اي سالىپ ناۋرىزدا تاعى باردىم، پيازدىڭ %20-30 عانا قالىپتى. دەمەك، قالعانى ساتىلدى دەگەن ءسوز. «وندىرىلگەن پيازدىڭ جارتىسى ءشىرىپ كەتتى» دەگەن شىندىققا جاناسپايدى. جالپى، پياز ماسەلەسى بۇعان دەيىن مەملەكەتارالىق كوميسسيا جانە جەرگىلىكتى اكىمدىكتەرمەن بىرلەسىپ قارالدى. قويمالارداعى پياز قورى ەكى رەت تەكسەرىلدى»، - دەيدى ساۋدا كوميتەتىنىڭ باسشىسى.

ەسكە سالا كەتەيىك، بيىل قاڭتاردا اۋىل شارۋاشىلىعى ءمينيسترىنىڭ بۇيرىعىمەن پيازدى ەلدەن شىعارۋعا تىيىم سالىنعان ەدى.

8- ساۋىردە قازاقستان پياز ەكسپورتىنا سالىنعان تىيىمدى الىپ تاستادى.