ءوت جولدارىن قالاي ەمدەۋگە بولادى؟ - دارىگەر جاۋاپ بەردى
بۇل تۋرالى دارىگەر، ديەتولوگ، نۋتريتسيولوگ گۇلبالا ەسەنبەك قىزى Turkystan.kz تىلشىسىنە ايتىپ بەردى.
دارىگەردىڭ ايتۋىنشا، ءوتتىڭ تولۋىنا ءبىرىنشى سەبەپ - دۇرىس تاماقتانباۋ. ەگەر ادام كۇنىنە ءۇش مەزگىل ۋاقتىلى تاماقتاناتىن بولسا، اعزادا ءوت جاقسى بولىنەدى. ال بۇل مەزگىلدى وتكىزىپ الىپ، تۇنگى ۋاقىتتا تاماقتانساڭىز، ءوت دۇرىس بولىنبەي، اۋرۋ پايدا بولۋى مۇمكىن. ويتكەنى اعزاڭىز ول كەزدە اسقازاناعا اس كەلەتىنىن بىلمەيدى. وسىنىڭ سالدارىنان ءوت دۇرىس تامباي، ءوت قالتاشاسىندا ۇيىپ تۇرا بەرەدى.
«رەجيم دۇرىس بولماعاندىقتان ءوت ۇيىپ، قويۋلانا باستايدى. وسىلاي قۇمعا، تاسقا اينالىپ، ادام ءوتىن الدىرىپ تاستاپ جاتادى. سودان كەيىن ءتۇرلى تورت، ءتاتتى، قۋىرىلعان تاعامداردى كوپ جەگەننەن باۋىردى ماي باسادى، حولەستەرين كوبەيەدى. مىسالى، مارگارينى بار تاماقتاردى الايىق. ءتۇرلى پەچەنە، شوكولاد جەپ جاتامىز. ونىڭ قۇرامى پايدالى ماي ەمەس، كەرىسىنشە زياندى حولەستەرين پايدا بولۋىنا اكەلەتىن مارگاريندەر. ول اعزامىزعا بارعان كەزدە دۇرىس سىڭبەي، قورىتىلماي قالادى. قانتامىرلارىمىزعا بارىپ قاتىپ، توڭماي سياقتى ۇيىپ قالادى»، - دەيدى گۇلبالا ەسەنبەك قىزى.
ديەتولوگ ادام سۋ نورماسىنا دا كوڭىل ءبولۋ كەرەكتىگىن ايتادى. سونىمەن قاتار مەيلىنشە پايدالى مايلاردى تۇتىنعان ءجون.
«ءبىز كوبىنە ارزان بولعاندىقتان رافيناتتالعان كۇنباعىس مايىن قولدانامىز. تاماق ىستەگەندە قازانىمىزدا ول ماي ەكى ءجۇز گرادۋستان اسا ىستىقتا قىزادى. سودان مايدىڭ قۇرامىندا توكسيندەر بولىنەدى. ول اعزامىزعا بارىپ، ارتىق قالدىق رەتىندە جابىسادى. مۇنىڭ ءبارى ءوت پەن باۋىرعا كەرى اسەر ەتەدى. ول توكسيندەر اعزامىزدا تۇرادى، شىقپايدى»، - دەيدى ديەتولوگ.
اعزانىڭ ساۋلىعى ءۇشىن تاماقتانۋ رەجيمىنە پايدالى مايلاردى قوسۋ ماڭىزدى. ادامدار ءزايتۇن، زىعىر، كوكوس، قولدىڭ سارى مايى قىمبات بولعاندىقتان كوپ تۇتىنباي جاتادى. مامان تاڭەرتەڭ پايدالى ماي تۇتىنۋ كەرەگىن ايتادى. ويتكەنى ول ءوت بولەدى ءارى ءوتتى سۇيىلتادى.
«تاماقتانعاندا اعزامىزعا قاجەتتى پايدالى مايلار، اقۋىزدار، كومىرسۋلار جەتىسپەي جاتادى.
ۇندى، ءسۇتتى، جالپى گليۋتەنى بار تاعامدار ءوتتىڭ قويۋلانۋىنا الىپ كەلەدى. سوسىن قيمىل قوزعالىستىڭ ازدىعى. تاڭەرتەڭنەن كەشكە دەيىن ءبىر ورىندا وتىرىپ جۇمىس ىستەيمىز. سودان دا ءوت دۇرىس بولىنبەيدى»، - دەيدى مامان.
ءوت دۇرىس ءبولىنۋ ءۇشىن ارنايى جاتتىعۋلاردى جاساۋعا بولادى. ال ءوت تولىپ، باۋىر مايلانعان جاعدايدا قالاي ەمدەلۋ كەرەك؟ دارىگەردىڭ ايتۋىنشا، ەڭ الدىمەن رەجيمدى دۇرىستاۋ قاجەت. ۋاقتىلى ۇيىقتاۋعا تىرىسقان ءجون.
«بەتكە ءتۇرلى داق شىقسا، شاش ءتۇسىپ، تىرناق سىنىپ، دەنەدە جاعىمسىز ءيىس پايدا بولسا، ءوت پەن باۋىردا پروبلەما بار دەگەن ءسوز. سول ءۇشىن تاماقتانۋ رەجيمىن ساقتاۋ كەرەك. ۋاقتىلى ۇيىقتاپ، ۋاقىتىندا تۇرىڭىز. كوبىرەك قيمىل- قوزعالىس قاجەت. پايدالى مايلاردى تۇتىنىڭىز. راتسيونىڭىزدا كوپ مولشەردە اقۋىز، كۇردەلى كومىرسۋ بولۋى قاجەت.
ال وتتە تاس بولسا، دارىگەردىڭ كەڭەسىمەن ەمدىك دوزادا ءدارى تاعايىندالادى. سونىمەن قاتار ماماننىڭ ايتۋىمەن تيۋباج پروتسەدۋراسىن جاساپ، ءتۇرلى مينەرالدى سۋ ارقىلى ءوتتى تازارتۋعا بولادى»، - دەيدى گۇلبالا ەسەنبەك قىزى.
