ايبەك سمادياروۆ قىتايمەن اراداعى ۆيزاسىز رەجيمگە قاتىستى تۇسىنىك بەردى
«كەيىنگى كەزدەرى قوعامدا قىتاي مەن قازاقستان اراسىنداعى ۆيزاسىز رەجيمگە قارسى پىكىرلەر ايتىلىپ جاتىر. بۇل كەلىسىمگە قول قويىلمادى. وعان قول قويىلسا عانا كۇشىنە ەنەدى. ەكىنشىدەن، بىلتىر جازدان بەرى قىتاي ازاماتتارى قازاقستانعا 14 كۇنگە ۆيزاسىز كەلە الادى. قازاقستان كوشەلەرىندە قىتايلار كوپ جۇرگەن جوق. ەندى 14 كۇنگە كەلەتىن ازاماتتار 30 كۇنگە كەلە الادى. كەلىسىم قازاقستانعا دا ءتيىمدى بولماق. ەگەر كەلىسىمگە قول قويىلسا، قازاقستان ازاماتى قىتايعا 30 كۇنگە ۆيزاسىز بارا الادى»، - دەدى ا. سمادياروۆ ەلوردادا وتكەن باسپا ءسوز ءماسليحاتىندا.
ونىڭ ايتۋىنشا، ەگەر ادام 30 كۇننەن اسا ەلدە بولسا، ول مىندەتتى تۇردە جازالانادى. ۆيزاسىز رەجيم تۋريستىك ءارى ىسكەرلىك ساپارلارعا ارنالىپ وتىر. وسى ورايدا كەلىسىمشارتتاردى بەكىتۋ، كونسۋلتاتسيا جۇرگىزۋ، سونداي- اق باسقا دا ىسكەرلىك قاتىناستارعا باعىتتالعان. بۇل تۇرعىدا جۇمىسقا ورنالاسۋعا رۇقسات ەتىلمەيدى.
«سونداي- اق، جۇك كولىگىن جۇرگىزۋشىلەر دە ۆيزاسىز كىرە الادى. بۇل ءبىراز ماسەلەنى شەشەدى. قوس ەل اراسىنداعى ساۋدا- ساتتىق ءوسىپ، ءوڭىرارالىق ىنتىماقتاستىق نىعايادى، ەكونوميكامىزعا اسەر ەتەدى. قىتاي - الپاۋىت ەكونوميكاسى بار مەملەكەت. قازاقستان - ورتالىق ازيادا قىتايمەن ۆيزاسىز رەجيم ورناتقان جالعىز مەملەكەت. مۇنى ءبىز ديپلوماتيالىق جەڭىس دەپ ەسەپتەيمىز»، - دەدى رەسمي وكىل.
ايبەك سمادياروۆ مامىردا اتالعان كەلىسىمگە قول قويىلۋى مۇمكىن ەكەنىن ايتتى.
بۇعان دەيىن حابارلانعانداي، بيىل ءساۋىر ايىندا سىرتقى ىستەر مينيسترلىگى ەلىمىز بەن قىتاي اراسىندا ورناۋى مۇمكىن ۆيزاسىز رەجيمگە تۇسىنىك بەردى.
«بۇل كەلىسىم تەك پىسىقتالىپ جاتىر. ءبىز ونى قوعامدىق تالقىعا شىعاردىق. ءبىراق كەيبىر ب ا ق بۇل كەلىسىمگە ەندىگى قول قويىلىپ قويعانداي ەتىپ جازدى»، - دەدى ايبەك سمادياروۆ.
«اشىق ن ق ا» پورتالىندا قازاقستان مەن قىتاي حالىق ۇكىمەتتەرىنىڭ اراسىنداعى ۆيزالىق تالاپتاردان ءوزارا بوساتۋ تۋرالى كەلىسىمگە قول قويۋ تۋرالى قاۋلى جوباسى جاريالاندى.
