رونالدۋ «رەالعا» ورالۋى مۇمكىن. فۋتبولشىعا اراب جەرىندە نە ۇناماي ءجۇر؟
El Nacional باسىلىمى اقپاراتى بويىنشا، فۋتبولشى اراب جەرىندە كوپتەگەن قيىندىقتى باسىنان وتكەرۋدە ەكەن.
رونالدۋ ساۋد ارابياسىنا بەيىمدەلە الماۋدا. مۇسىلمان مەملەكەتىنىڭ كەي زاڭدارى فۋتبولشى مەن وتباسى مۇشەلەرىنىڭ كەي قىلىقتارىنا قاراما- قايشى كەلەدى. ودان كەيىن ويىنشىعا ءتىل ۇيرەنىپ، پىكىر الماسۋدا دا قيىندىقتار كوپ. ەگەر اراب كومانداسىنان ەرتەرەك قايتۋدىڭ جولىن تاپسا، فۋتبولشىنى «رەال» پرەزيدەنتى فلورەنتينو پەرەس قۇشاق جايا قارسى الۋعا ءازىر. ءبىراق رونالدۋ كەلىسىمشارتتى قايتپەك؟
فۋتبولشىنىڭ اراب جەرىندەگى العاشقى ايى تاماشا ءوتتى. ءتىپتى جانكۇيەرلەر ونىڭ «ءال- ناسر» كومانداسىنا اۋىسقانىنا سەنە دە قويعان جوق. كەيىننەن باسپا ءسوز بەتتەرىندە ايەلى دجوردجينا رودريگەستىڭ جەرگىلىكتى زاڭ ەرەجەلەرىنە باعىنباي، اشىق كيىنگەنى جايلى اقپار تارادى. بۇل مۇسىلمان مەملەكەتىندەگى ەرەجەنى ساقتاماعانى ءۇشىن ايىپپۇل سالىنۋى كەرەك بولعان. ساۋد ارابياسىندا 2019 -جىلدان بەرى قوعامدىق ورىنداردا جابىق كيىنۋ جايلى زاڭ بار. الايدا بۇل داۋ باسىلىپ، ايىپپۇل تولەگەن جوق. ءبىراق رونالدۋدىڭ ايەلى ءوزىنىڭ وبرازىن پاش ەتىپ، ارا- تۇرا ءسان الەمىندەگى ءستيلىن ساقتاعىسى كەلەتىنى جاسىرىن ەمەس.
ناۋرىز ايىنىڭ باسىندا رونالدۋ «ءال- باتەن» كومانداسىمەن وتكەن ويىننان كەيىن جانكۇيەرلەر قىسىمىنا قىزۋقاندى جاۋاپ بەرىپ، ەرسى قىلىق جاسادى. بۇل دا ب ا ق نازارىنان تىس قالمادى. ال ءساۋىر ايىنىڭ ورتاسىندا «ءال- فەيحا» كومانداسىمەن بولعان ويىندا قارسىلاستارىنا قاتتى سويلەپ، ويىننىڭ شىرقىن بۇزدى دەپ ايىپتالدى.
ءساۋىر ايىندا «ءال- ناسر» كومانداسىنىڭ باس جاتتىقتىرۋشىسى رۋدي گارسيا قىزمەتىنەن بوساتىلدى. وعان رونالدۋدىڭ تىكەلەي قاتىسى بار دەپ ايتىلدى. سەبەبى فرانسۋز مامانى جۇمىسىنا ويىنشىنىڭ كوڭىلى تولماعان دەسەدى. الايدا پورتۋگالدىق الەۋمەتتىك جەلىسىندە جازبا جاريالاپ، باس جاتتىقتىرۋشىمەن جىلى قوشتاستى.
«ءال- حيلال» كومانداسىنا قارسى وتكەن ويىننان كەيىن رونالدۋ تاعى دا سىن قۇرىعىنا ىلىكتى. بۇل جولى كەزدەسۋدەن كەيىن «مەسسي، مەسسي» دەپ ايقايلاعان جانكۇيەرلەر توبىنا قاراپ انايى قىلىق كورسەتكەن. بۇل ءۇشىن اراب ادۆوكاتى نۋف بين احمەد ويىنشىنى سوتقا بەرۋ كەرەك دەپ مالىمدەدى.
اراعا بىرەر كۇن سالا «ءال- ناسر» ساۋد ارابياسى كۋبوگى جولىنداعى ويىندا «ءال- ۆاحدا» كومانداسىنان ۇتىلدى. ءبىرىنشى تايمنان كەيىن كريشتيانۋ مەن كوماندا جاتتىقتىرۋشىلارى سوزگە كەلىپ قالعان. قارسىلاس كوماندا ويىنشىلارى دا تانىمال فۋتبولشىنىڭ الاڭداعى ارەكەتىنە (كوماندالاستارىنا ايقايلاعان) تاڭدانىستارىن ءبىلدىردى.
باتىستىق باسىلىمدار كەيىنگى ۋاقىتتا رونالدۋ ايەلىمەن اجىراسقالى جاتىر دەپ تە ءجيى جازا باستادى. وعان سەبەپ - رودريگەستىڭ ساۋدا ورىندارىنا كوپ بارىپ، قىرۋار قارجى جاراتاتىنى جايلى ەدى. الايدا ويىنشى بۇل الىپ- قاشپا اقپاراتقا جاۋاپ رەتىندە الەۋمەتتىك جەلىسىندە ايەلىمەن «ماحاببات ءۇشىن» دەپ جازبا جاريالادى.
رونالدۋ ساۋد ارابياسىنداعى بەس اي ىشىندە بىرنەشە رەت جاعىمسىز جاعدايلارعا تاپ بولدى. الايدا الەمدە ەڭ كوپ جالاقى الاتىن ويىنشى رەتىندە تانىتقان «ءال- ناسر» كومانداسىمەن كەلىسىمشارتتى ەرتە اياقتاۋى دا ەكىتالاي. الدە «رەالدىڭ» ۇسىنىسى فۋتبولشىنى قىزىقتىرار ما ەكەن؟ ءبىراق قانداي قىزمەتكە كەلەدى؟ فۋتبولشى رەتىندە، الدە El Nacional جازعانداي كلۋب امباسسادورى بولا ما؟
massaget.kz
