كۇنباعىس مايى ارزاندادى - ساۋدا ءمينيسترى

استانا. قازاقپارات – ق ر ساۋدا جانە ينتەگراتسيالار ءمينيسترى سەرىك جۇمانعارين ماۋسىمارالىق كەزەڭدە حالىقتى ازىق-تۇلىكپەن قامتۋ جۇمىستارى تۋرالى ايتىپ بەردى، دەپ حابارلايدى قازاقپارات ءتىلشىسى.

«نارىقتاعى باعانى تۇراقتاندىرۋ تەتىكتەرى شەڭبەرىندە جاسالعان قوردان نارىقتى تولىقتىرۋ جۇمىستارى جالعاسۋدا. بيىل تاريفتىك/تاريفتىك ەمەس رەتتەۋدىڭ ۋاقتىلى شارالارى وڭ ناتيجە بەردى»، - دەدى س. جۇمانعارين ۇكىمەتتىڭ بۇگىنگى وتىرىسىندا.

ماسەلەن، كۇنباعىس تۇقىمىنا كەدەندىك باج سالىعىن ەنگىزۋ ارقىلى وندىرۋشىلەردە كۇنباعىس مايىنىڭ باعاسىن تۇراقتاندىرۋعا مۇمكىندىك تۋدى. قازىرگى ۋاقىتتا وڭدەۋ كاسىپورىندارىندا جانە ساۋدا ورىندارىندا كۇنباعىس مايى باعاسىنىڭ تومەندەۋ ديناميكاسى بايقالادى.

«پيازدىڭ اگرەسسيۆتى ەكسپورتىن بولدىرماۋ ءۇشىن 3 ايعا ەكسپورتقا تىيىم سالىنعان، كەيىنەن بۇل تىيىم كۆوتاعا اۋىستىرىلدى. بۇل شارا حالىقتى پيازبەن قامتاماسىز ەتۋگە مۇمكىندىك بەردى جانە الدىڭعى جىلدارداعى قىرىققابات پەن كارتوپ سياقتى باعانىڭ كۇرت وسۋىنە جول بەرمەدى»، - دەدى مينيستر.

قازىرگى ۋاقىتتا 2024-جىلدىڭ ماۋسىمارالىق كەزەڭىن قامتاماسىز ەتۋ ءۇشىن 2023-جىلعى كۇزگى ەگىنگە كەلىسىمشارتتار جاسالۋدا. بۇگىنگى تاڭدا 90 مىڭ تونناعا جۋىق ءونىم جينالعان.

«جەرگىلىكتى اتقارۋشى ورگاندار كەلەسى جىلدىڭ ماۋسىمارالىق كەزەڭىندەگى كەلىسىمشارتتاردى جاساۋدى جىلدامداتۋى كەرەك»، - دەپ ەسكەرتتى ساۋدا ءمينيسترى.

بۇعان دەيىن سەرىك جۇمانعارين ەلىمىزدىڭ قانداي ازىق-تۇلىك يمپورتىنا تاۋەلدى بولىپ وتىرعانىن ايتتى.