پرەمەر-مينيستر «ازىق-تۇلىك كورپوراتسياسى» جۇمىسىن قايتا قۇرۋدى تاپسىردى
ۇكىمەت باسشىسى اۋىل شارۋاشىلىعى ونىمدەرىن ساقتاۋدىڭ قاجەتتى ينفراقۇرىلىمى قۇرىلىپ جاتقانىن ايتتى.
«بۇگىنگى تاڭدا جالپى سىيىمدىلىعى 2 ميلليون تونناعا جۋىق كوكونىستەر مەن جەمىستەردى ساقتايتىن 1200 دەن استام نىسان بار. بۇل - جەتكىلىكسىز. ولاردىڭ كوبى ابدەن ەسكىرگەن. جاڭا كوكونىس قويمالارى قاجەت. فەرمەرلەر ءبىرىڭعاي مەملەكەتتىك سۋبسيديالاۋ اقپاراتتىق جۇيەسىنە شاعىم ايتۋدا. بۇل سالاداعى وندىرىسكە تەرىس اسەرىن تيگىزۋى مۇمكىن»، - دەدى ءاليحان سمايىلوۆ ۇكىمەتتىڭ بۇگىنگى وتىرىسىندا.
پرەمەر-مينيستر ازىق-تۇلىك قاۋىپسىزدىگىن قامتاماسىز ەتۋ جوسپارى بويىنشا جۇمىستى جالعاستىرۋدى تاپسىردى.
«اۋىل شارۋاشىلىعى مينيسترلىگى ساۋدا مينيسترلىگىمەن جانە ءوڭىر اكىمدىكتەرىمەن بىرلەسىپ، نارىقتىڭ ناقتى قاجەتتىلىگىن ەسكەرىپ، جاڭا كوكونىس قويمالارىن سالۋ جانە قولدانىستاعى قويمالاردى جاڭعىرتۋ بويىنشا كەشەندى جوسپاردى وزەكتەندىرۋى قاجەت. اۋىل شارۋاشىلىعى مينيسترلىگى ءوڭىر اكىمدىكتەرىمەن بىرلەسىپ، بارىنشا قىسقا مەرزىمدە سۋبسيديالاۋ ونلاين-پلاتفورماسىنىڭ ءتيىستى جۇمىسىن قامتاماسىز ەتۋى كەرەك. ساۋدا جانە ينتەگراتسيا مينيسترلىگى جەرگىلىكتى اتقارۋشى ورگاندارمەن، «قازاقستان تەمىر جولى» كومپانياسىمەن بىرلەسىپ، ماۋسىم ايىنىڭ سوڭىنا دەيىن الەۋمەتتىك ماڭىزى بار ازىق-تۇلىكتىڭ قاجەتتى ونىمدەرىن ساتىپ الۋدى، ونىڭ ىشىندە كورشى ەلدەردەن اكەلۋدى قامتاماسىز ەتسىن»، - دەدى ءا. سمايىلوۆ.
سونداي-اق، اۋىل شارۋاشىلىعى مينيسترلىگىنە «ازىق-تۇلىك كورپوراتسياسى» جۇمىسىن ەلىمىزدىڭ ازىق-تۇلىك قاۋىپسىزدىگىن جانە الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋعا باعىتتاي وتىرىپ، قايتا قۇرۋ تاپسىرماسى بەرىلدى.
بۇعان دەيىن ءاليحان سمايىلوۆ ازىق-تۇلىك قىمباتتاماۋ ءۇشىن قانداي شارالار قولعا الىنعانىن ايتقان ەدى.
