ءساۋىر ايىندا قازاقستاندا نە قىمباتتادى

استانا. قازاقپارات - ۇلتتىق ستاتيستيكا بيۋروسى ءساۋىر ايىندا قاي باعىتتا باعالار قىمباتتاعانى تۋرالى مالىمەت ۇسىندى، دەپ حابارلايدى قازاقپارات.

ساۋىردە تۇتىنۋ باعالارىنىڭ يندەكسى ايلىق ماندە 0,9 پايىزدى قۇرادى، تيىسىنشە كورسەتكىش ناۋرىز دەڭگەيىندە ساقتالدى. يندەكس قۇرىلىمىندا ازىق-تۇلىككە جاتپايتىن تاۋارلار - 1,3 پايىز، ازىق-تۇلىك تاۋارلارى - 0,9 پايىز، اقىلى قىزمەتتەر 0,4 پايىز قىمباتتادى.

ازىق-تۇلىككە جاتپايتىن تاۋارلاردىڭ ىشىندە ساۋىردە باعانىڭ ەڭ جوعارى ءوسىمى ديزەل وتىنىنا 16,1 پايىز، بەنزينگە 9,7 پايىز تىركەلدى. ناۋرىز ايىمەن سالىستىرعاندا جۋۋ جانە تازالاۋ قۇرالدارىنىڭ قۇنى 1,4 پايىز، جەكە گيگيەنا قۇرالدارى 1,1 پايىز، ىدىس-اياق 1 پايىز، تۇرمىستىق تەحنيكا 0,9 پايىزعا وسكەن.

ازىق-تۇلىك تاۋارلارى اراسىندا جەمىس پەن كوكونىس ەداۋىر قىمباتتاعان - قىرىققابات 4,7 پايىز، قىزاناق 4,1 پايىز، ءجۇزىم 3 پايىز، الما 2,6 پايىز، المۇرت 2,4 پايىزعا قىمباتتاعان. باعانىڭ ءوسۋى كۇرىشكە - 2,7 پايىز، سالقىنداتىلعان سۋسىندارعا - 2,5 پايىز، روجكيلەرگە، ۋلتراپاستەرلەنگەن سۇتكە - ءارقايسىسى 2,4 پايىزعا، سالقىنداتىلعان بالىققا - 2,2 پايىز، پاستەرلەنگەن ءسۇت، ماكارون ونىمدەرىنە - ءارقايسىسى 2,1 پايىزعا بايقالدى. بۇل رەتتە قيار - 11,4 پايىز، قاراقۇمىق جارماسى - 3,7 پايىز، كۇنباعىس مايى 2,6 پايىزعا ارزاندادى.

قىزمەت كورسەتۋ بويىنشا باعالاردىڭ ءوسۋى جولاۋشىلار اۋە كولىگىندە بايقالدى، ءبىر ايدىڭ ىشىندە ۇشۋ قىزمەتى 17,7 پايىز قىمباتتادى. شاشتاراز بەن سۇلۋلىق سالوندارىنىڭ اقىسى - 1,5 پايىز، جەرلەۋ قىزمەتتەرى - 1 پايىز ارتتى. ساناتوري قىزمەتتەرى - 1,1 پايىز، دەنساۋلىق ساقتاۋ قىزمەتتەرى 0,9 پايىز قىمباتتاعان.

وڭىرلەر اراسىندا ەڭ جوعارى ايلىق ينفلياتسيا اباي جانە ۇلىتاۋ وبلىستارىندا - ءارقايسىسىندا 1,4 پايىزعا (ورتاشا رەسپۋبليكالىق دەڭگەيدەن 0,5 پ. ت. جوعارى)، ەڭ تومەنگى استانا قالاسىندا تىركەلدى - 0,5 پايىز.

وڭىرلەر بويىنشا ازىق-تۇلىك تاۋارلارى باعاسىنىڭ ەڭ جوعارى ءوسىمى: باتىس قازاقستان وبلىسىندا - 1,8 پايىز، ازىق-تۇلىككە جاتپايتىن تاۋارلار بويىنشا الماتى وبلىسىندا - 3 پايىز، اقىلى قىزمەتتەردە تۇركىستان وبلىسىندا - 2,3 پايىز.

جىلدىق ماندە ينفلياتسيا دەڭگەيى قاتارىنان ەكىنشى اي بايالاۋپ كەلەدى: 2023-جىلعى ساۋىردە - 16,8 پايىز، 2023-جىلعى ناۋرىزدا - 18,1 پايىز، 2023-جىلعى اقپاندا - 21,3 پايىز. جىلدىق ماندە ازىق-تۇلىك تاۋارلارىنىڭ باعاسى 17,9 پايىز، ازىق-تۇلىككە جاتپايتىن تاۋارلار 18,2 پايىز، اقىلى قىزمەتتەر 13,7 پايىز ءوستى.

2022-جىلعى ساۋىرمەن سالىستىرعاندا كەڭسە تاۋارلارى - 68,5 پايىز، كىر سابىن - 59,3 پايىز، شاقپاق قانت - 51,7 پايىز، ىدىستى جۋۋعا ارنالعان قۇرالدار - 51,6 پايىز، قيار - 50,9 پايىز، بالالار سابىنى - 49,6 پايىز، كۇرىش - 43,9 پايىز، كىر جۋۋ ۇنتاعى - 43 پايىز، دارەتحانا قاعازى 42,7 پايىزعا قىمباتتادى. جىلدىق ماندە، كەرىسىنشە، قىرىققابات - 53,4 پايىز، ءسابىز 19,2 پايىز ارزاندادى.

«ينفلياتسيا دەڭگەيىن سيپاتتايتىن تۇتىنۋ باعالارى يندەكسىنىڭ كورسەتكىشى اي سايىن ەسەپتەلەدى. تۇتىنۋ باعالارىنىڭ يندەكسىن ەسەپتەۋ كەزىندە پايدالانىلاتىن تاۋارلار مەن قىزمەتتەر سەبەتى 508 تاۋار مەن قىزمەتتەن تۇرادى، مۇندا: 160 - ازىق-تۇلىك تاۋارلارى، 243 - ازىق-تۇلىككە جاتپايتىن تاۋار جانە 105 اقىلى قىزمەتتەر. باعالاردى تىركەۋ بارلىق وبلىس ورتالىعىندا، استانادا جانە قالالار مەن اۋدان ورتالىقتارىندا ءارتۇرلى مەنشىك نىسانىنداعى ساۋدا جانە قىزمەت كورسەتۋ كاسىپورىندارىنىڭ ىرىكتەمەلى جەلىسى بويىنشا جۇرگىزىلەدى»، - دەپ ءتۇسىندىردى بيۋرونىڭ باعا ستاتيستيكاسى دەپارتامەنتىنىڭ ديرەكتورى قۋانىشبەك جاقىپبەك ۇلى.

2023-جىلعى قاڭتاردان باستاپ، تۇتىنۋ باعالارىنىڭ يندەكسىن ەسەپتەگەندە ازىق-تۇلىك تاۋارلارىنىڭ ۇلەسى - 41,8 پايىز، ازىق-تۇلىككە جاتپايتىن تاۋارلار - 29,6 پايىز، اقىلى قىزمەتتەر 28,6 پايىز قۇرايدى.