تۇركىستان وبلىسىندا كۇش اتاسى قاجىمۇقاننىڭ كەۋدەسىندە سىنعان تاس تابىلدى
سوزاق اۋدانىنداعى شاعا ەلدى مەكەنىنە قاراستى اعالاق اۋىلىنان تابىلعان تاس ۇشكە ءبولىنىپ كەتكەن. ءار بولىكتى بەس جىگىت ارەڭ كوتەرىپ، كولىككە سالعان. جەرگىلىكتى تۇرعىنداردىڭ ايتۋىنشا، مۇنىڭ ءوزى قاجىمۇقاننىڭ كەۋدەسىندە سىنعان تاستىڭ تورتتەن ءبىر بولىگى عانا ەكەن.
«تاريحي تاستى تاۋىپ، بىزگە حابارلاسقان شاعا اۋىلىنىڭ تۇرعىنى قابىل قوستانشايەۆ پەن اعالاق ەلدى مەكەنىنىڭ تۇرعىنى باۋىرجان ابەنوۆ ەسىمدى ازاماتتارعا ۇلكەن العىس ايتامىن. سول كۇنى اۋداننىڭ بەلسەندى ازاماتى باقداۋلەت بايمۇسايەۆ ەكەۋمىز شاعا اۋىلىنا جول تارتتىق. ارادا قانشاما جىلدار وتسە دە تاستار سول كۇيىندە ساقتالىپ قالىپتى»، - دەيدى ولكەتانۋشى ماقسات قارعاباي.
جەرگىلىكتى تۇرعىنداردىڭ سوزىنشە، قاجىمۇقان مۇڭايتپاس ۇلى سوزاق جەرىنە ەكىنشى دۇنيەجۇزىلىك سوعىس جىلدارى كەلگەن. وڭىردەگى قىرىق كولحوزدى ارالاپ ونەر كورسەتىپ ءجۇرىپ، شاعا ەلدى مەكەنىنە قاراستى اعالاق اۋىلىنا توقتاعان. سوندا ەلدىڭ كوزىنشە كەۋدەسىنە ۇلكەن تاستى قويدىرىپ، جىگىتتەرگە اۋىل ۇستاسى جاساعان سوم بالعامەن ۇرعىزىپ، سىندىرتادى.
«مەنىڭ انام تۇرعانكۇل بايشە قىزى قاجىمۇقان پالۋاندى ءوز كوزىمەن كورگەن. كەۋدەسىنە قويىلعان تاستى سىندىرعان وقيعانىڭ دا كۋاگەرى بولعان. كەيىننەن اۋىل ادامدارى ول تاسقا ەشكىمدى تيىسكىزبەگەن. العاشقىدا وشاق جاساۋ ءۇشىن ءبىر-ەكى ادامدار الماقشى بولعاندا، قاريالار تيىپ تاستاپتى»، - دەيدى باۋىرجان ابەنوۆ.
قاجىمۇقاننىڭ كەۋدەسىندە سىنعان تاس شولاققورعان اۋىلىندا ورنالاسقان سۇلتانبەك قوجانوۆ اتىنداعى سوزاق اۋداندىق تاريحي- ولكەتانۋ مۋزەيىنە قويىلدى. مۋزەي ديرەكتورى ءنيازالى دۇيسەنبەك جاستاردى ولكەنىڭ تاريحىمەن تانىستىرۋ باعىتىندا بۇل جادىگەردىڭ ماڭىزى جوعارى بولاتىندىعىن جەتكىزدى.
«ءبىز اۋداننان شىققان سپورت ساڭلاقتارىنىڭ جەتكەن جەتىستىكتەرى جايىندا ارنايى ءبولىم جاساپ جاتىرمىز. تاريحي تاستاردى سوندا قويدىق. اۋىل جاستارىن سپورتقا باۋلۋ، ولكە تاريحىمەن تانىستىرۋ باعىتىندا بۇل جادىگەردىڭ ورنى بولەك، ماڭىزى دا جوعارى بولادى»، - دەيدى ول.
