كادىرحان قيزات ۇلى. رۋحىڭا تاعىزىم باتىر اتا
پەداگوگيكالىق ينستيتۋتتان ءبىلىم العان. 1980-1995-جىلدارى ارالىعىندا وقىتۋشى، 1995-2014-جىلدارى ءدوربىلجىن اۋداندىق مادەنيەت ءۇيىنىڭ ديرەكتورى مىندەتىن اتقارىپ، 2014-جىلى زەينەتكە شىققان.
1980 -جىلدان باستاپ ولەڭ جازىپ گازەت جۋرنالداردا 300 گە جۋىق ولەڭ، تولعاۋلار مەن سالتتىق جىرلار جاريالاعان. 1986 -جىلدان باستاپ اۋدان، ايماق، وبلىس جانە ولكەلىك ايتىسقا قاتىسقان ول «ولكە دارەجەلى ايتىس اقىنى» التىن مەدالىنىڭ يەگەرى اتانعان.
سونداي-اق، كادىرحان قيزات ۇلى تارباعاتاي ايماعىنىڭ ەڭبەگى سىڭگەن مادەنيەت قايراتكەرى. ول شينجياڭ ادەبيەت-كوركەمونەرشىلەر قوعامى، شينجياڭ اقىندار ايتىسىن زەرتتەۋ قوعامى، ق ر اۆتورلار قوعامى قاتارلى بىرنەشە قوعامدىق ۇيىمداردىڭ مۇشەسى.
«قارىمجى» اتتى ايتىس جانە ولەڭدەر جيناعىنىڭ، «قايران داۋرەن» اتتى ساتيرالىق جيناقتىڭ، «ساۋعا» اتتى زەرتتەۋ ماقالالار جيناعىنىڭ اۆتورى.
اقىن 2016-جىلى اتا جۇرتىنا قونىس اۋدارعان. قازىر اقمولا وبىلىسى قوسشى قالاسىندا تۇرادى.
بۇگىن ءبىز اقىن كادىرحان قيزات ۇلىنىڭ ق ر حالىق قاھارمانى راقىمجان قوشقاربايەۆتىڭ 99 جىلدىعىنا وراي جازعان ارناۋ ولەڭىن ۇسىنىپ وتىرمىز.
«رۋحىڭا تاعىزىم باتىر اتا»
قوس قولىن دۇعا قىلسا دوستار جايىپ،
ەل-جۇرتىڭ ەسىنە الىپ جاتقانداي ۇق!
مارتەبەڭ مەن تاعى ءبىر اسپاندايىق،
رۋحىڭا تاعىزىم ەتىپ قوشقاربايەۆ!
سەن ەدىڭ ءتول تۋماسى اقمولانىڭ،
سەن جايلى كۇردەلى ويعا تاپ بولامىن.
وندا جۇرت ويلادىما وزىڭىزدەي،
بالادان باسىمىزعا باق قونارىن!
زۇلىم زامان ناۋبەتى باستالعاندا ەل،
ايعاي-شۋعا ۇلاسىپ اسپان مەن جەر.
ءتورت جاسىڭدا اناڭدى اجال قارماپ،
سورلى كۇننىڭ سورابى باستالعان جەر.
«حالىق جاۋى» بولعاندا بايتەرەگىڭ،
شىن جەتىمدىك كۇن كەشكەن ءدال سەن ەدىڭ.
پانا بولعان تارعالاڭ تاعدىرىڭا،
ينتەرناتى ەڭ العاش تايتوبەنىڭ.
كورە ءجۇرىپ اپتاپ پەن سۋىق كۇندى،
ءومىر ساعان تىم ەرتە سىر ۇقتىردى.
قاناتىڭدى قاتايتىپ اۋىر كۇندەر،
شىم بولاتتاي شيراتىپ شىنىقتىردى.
سوعىس سالعان سويقان مەن تولعان زارعا،
وزبىرلىقتا ايالار تالعام بارما؟
ون جەتىڭدە سالداتتىق سابىنا ەنىپ،
جيىرما بىردە اتتاندىڭ قان مايدانعا.
تالاي جاۋدى جايراتىپ قايتپاس جالىن،
كومانديردە بوپ كەيدە توپ باستادىڭ.
وق پەن وتتىڭ امان قاپ اراسىنان،
«وق وتپەس» دەپ اتاعان ساپتاستارىڭ.
سوعىس ءورتى لاۋلاعان ورتاڭ ءمالىم،
جاۋ قامالىن بۇزۋدى سەن تاڭدادىڭ.
قوس باتىر قوشقاربايەۆ، گريگوري،
ولسەم شاھيت، قازى دەپ قالسام جانىم.
جەتى جارىم ساعاتتاي جەر باۋىرلاپ،
فاشيستتىڭ بەكىنىسىن تالقاندادىڭ!
جۇزىڭنەن ءبىر عاجايىپ ەرلىك ەسىپ،
كوزىڭنەن قوس تامشى جاس مولدىرەتىپ.
بەرليننىڭ قاق ورتاسى قان مايدانعا،
جەڭىس تۋىن قادادىڭ جەلبىرەتىپ.
جاۋىنىڭ توبەسىنەن جاسىن قاداپ،
قارادى بايتاق ەلگە باتىر قازاق.
سۇراپىل سوعىس ءورتى تىندى سولاي،
كۇل بولىپ اقىرعان جاۋ، اتىلعان وق.
ۇشقاندا باتىر ەلدىڭ قۇسى بيىك،
سۇم بيلىك قۋانعان جوق ءتۇسى جىلىپ.
قارادى بار شىندىققا كوزىن جۇمىپ،
كەڭەستىك كەر زاماننىڭ ءىشى كۇيىپ.
كورسەتتى باتىر سولاي ەڭ ەرلىگىن،
ەڭبەكسىزدى باتىرعا تەڭەيدى كىم؟
كورسەتتى كوزسىز باتىر ەگەيلىگىن،
ءبىلدىردى وزبىر وداق وگەيلىگىن.
بولساداعى عۇمىرىڭ شەكتى عانا،
جۇرەگىندە باتىردىڭ وت تىناما.
ەل-جۇرتىڭا ماراپات سيلاپ ماڭگى،
ءوزىڭ ءبىراق كورە الماي كەتتىڭ اعا.
ءبىز قالايشا وزىڭمەن ماقتانبايىق،
ءبىز قالايشا ءوزىڭدى ەسكە المايىق.
تاۋەلسىز وتان ءۇشىن وت كەشۋگە،
وزىڭدەي بولۋ كەرەك جاستار لايىق.
بويىنا ۇرپاعىڭنىڭ قان بوپ تاراپ،
قولداي بەر رۋحىڭمەنەن قوشقاربايەۆ!
كادىرحان قيزات ۇلى
2023-جىلى 30-ءساۋىر
