ارميان قىزى سيۋزاننا وۆسەپيان: قازاق اندەرىن ەرەكشە تامسانىپ تىڭدايمىن

بالقاش. قازاقپارات - بالقاش قالاسىندا تۇراتىن ارميان قىزى سيۋزاننا وۆسەپيان قازاق ءتىلىن ۇيرەنۋگە وعان قازاق حالىق اندەرى تۇرتكى بولعانىن ايتادى.

مەملەكەتتىك ءتىلدى جەتىك مەڭگەرگەن بويجەتكەن بولاشاقتا وزگە ۇلت وكىلدەرىنە قازاق ءتىلىن ۇيرەتۋدى ماقسات قىلىپ وتىر.

سيۋزاننا وۆسەپيان ۇلى اقىن اباي قۇنانبايەۆتىڭ «كوزىمنىڭ قاراسى» ءانىن ورىنداعاندا، تۋعاندارى مەن دوستارى ونى ەلجىرەپ تىڭدايدى. بۇل ءان جۇمىر جەر بەتىندەگى ءار قازاق بالاسىنا تانىس دەسەك تە، جاس ونەرپازدىڭ ورىنداۋىندا تىپتەن تۇرلەنىپ كەتەدى.

سيۋزاننا وۆسەپياندى قازاقشا ءان ايتۋعا ەشكىم كۇشتەپ ۇگىتتەمەگەن. قازاقتىڭ ءان ونەرىنە دەگەن قۇشتارلىعى مەكتەپ قابىرعاسىندا باستالعان. سودان قازاق مۋزىكاسىن جانىنا سەرىك ەتىپ كەلەدى. ءتىپتى مەملەكەتتىك ءتىلدى ۇيرەنۋگە دە وسى ءان جەتەلەگەن ەكەن.

«كوزىمنىڭ قاراسى» ءانىن ورىنداعاندا قازاق حالقىنا دەگەن ەرەكشە ماحابباتىمدى سەزىنەمىن. قازاق اندەرى اۋەندى، اۋەزدى، اسەم بولىپ كەلەدى. قازاق اندەرىن ەستىپ قالسام، ەرەكشە تامسانىپ تىڭدايمىن»، - دەيدى سيۋزاننا وۆسەپيان.

سيۋزاننا ءۇشىن پوەزيا - ۇلى الەم، تىلسىم كۇش. ول قازاقتىڭ باس اقىنىنىڭ شىعارمالارىنان تاربيە الىپ، تاعىلىم تەرەتىنىن جەتكىزدى.

«قازاق ءتىلىن ۇيرەنۋ سونشالىقتى قيىن ەمەس. ەگەر ورتاڭ قازاقى بولسا، تىپتەن وڭاي. قازاق ءتىلىن جەتىك مەڭگەرۋدىڭ ارتىقشىلىقتارىنا توقتالار بولسام، ءبىرىنشى كەزەكتە دوستارىمنىڭ قاتارى ارتىپ كەلەدى. ولارمەن ەركىن قازاق تىلىندە سويلەسىپ، ءبارىن تۇسىنەمىن. ءوز- ءوزىمدى دامىتۋعا دا سەپتىگىن تيگىزۋدە»، - دەپ ءبولىستى بويجەتكەن.

سيۋزاننا وۆسەپيان ءاليحان مۋسين اتىنداعى بالقاش گۋمانيتارلىق-تەحنيكالىق كوللەدجىنىڭ 2-كۋرس ستۋدەنتى. بولاشاق ماماندىعى - باستاۋىش سىنىپ مۇعالىمى. سونىمەن قاتار قازاق ءتىلىن مەڭگەرگىسى كەلەتىن وزگە ۇلت وكىلدەرىنىڭ بالالارىن وقىتادى.