قازاقتىڭ ءتىلى مەن مادەنيەتى قىزىقتىرادى - اتىراۋلىق دومبىراشى اندريان رومانوۆ
«تۋعان ەلىڭنىڭ تاريحىن، جەرگىلىكتى ۇلتتىڭ ءتىلى مەن سالت- ءداستۇرىن، ادەبيەتى مەن مادەنيەتىن تەرەڭ ءبىلۋ ارتىق ەتپەيدى. ءوزىم قازاقشا ەركىن سويلەيمىن» دەگەن ول بولاشاعىن قازاق ونەرىمەن بايلانىستىرعىسى كەلەدى، دەپ حابارلايدى قازاقپارات ءتىلشىسى.
اندريان رومانوۆ جىلىوي اۋدانىنىڭ ورتالىعى - قۇلسارى قالاسىندا تۇرادى. وسىنداعى قۇلسارى بالالار ونەر مەكتەبىنىڭ دومبىرا كلاسىن بىتىرگەن. ال، ءىنىسى فورتەپيانو كلاسىندا وقىپ ءجۇر.
ول بىلتىر «مىڭ بالا» جوباسى اياسىندا «ونەرلى ورگە جۇزەر» بايقاۋىنا قاتىسقان. بايقاۋدىڭ ماقساتى - وزگە ەتنوستار بالالارىنىڭ قازاقتىڭ ۇلتتىق ونەرىن مەڭگەرۋگە قىزىعۋشىلىعىن وياتۋ.
«مەنىڭ تاڭداعان اسپابىم - دومبىرا. كىشكەنتاي كەزىمنەن دومبىرانىڭ ءۇنىن ۇناتۋشى ەدىم. ال، دومبىرا تارتۋدى ۇستازىم تالانت بالعىنبايەۆ ۇيرەتتى. بايقاۋدا قازاقتىڭ قايتالانباس كومپوزيتورى قۇرمانعازى ساعىرباي ۇلىنىڭ «اداي» كۇيىن ورىندادىم. نەگە بۇل كۇيدى تاڭدادىم؟ ويتكەنى، بۇل - ادامنىڭ كوڭىل- كۇيىن شارىقتاتاتىن، جىگەرلەندىرەتىن كۇي. وسى كۇيدى ورىنداۋ ارقىلى بايقاۋدىڭ جەڭىمپازى اتاندىم. استانادا اقپارات جانە قوعامدىق دامۋ ءمينيسترى دارحان قىدىرالىنىڭ قولىنان ماراپات العان ساتتە قۋانىشىمدا شەك بولمادى. دومبىرادا ويناۋدى مەڭگەرۋىمە، رەسپۋبليكالىق بايقاۋدىڭ جەڭىمپازى اتانۋىما ۇستازىمنىڭ ەڭبەگى زور» - دەيدى اندريان رومانوۆ.
جاس دومبىراشىنىڭ ايتۋىنشا، جىلىوي اۋدانىندا قازاقپەن بىرگە بىرنەشە ەتنوستىڭ وكىلى تۇرادى. ونىڭ ىشىندە ورىستار مەن تاتارلار، وزبەكتەر پەن قاراقالپاقتار بار.
«ءبىزدىڭ اۋداندا قازاقتىڭ ونەرىن دارىپتەپ جۇرگەن، اسىرەسە، دومبىرا شەرتۋدى مەڭگەرگەن وزگە ەتنوستىڭ وكىلدەرى دە بار. ويتكەنى، تۋعان ەلىڭنىڭ تاريحىن، جەرگىلىكتى ۇلتتىڭ ءتىلى مەن سالت- ءداستۇرىن، ادەبيەتى مەن مادەنيەتىن تەرەڭ ءبىلۋ ارتىق ەتپەيدى. ءوزىم قازاقشا ەركىن سويلەيمىن»، - دەيدى اندريان رومانوۆ.
ەندى ول بولاشاعىن قازاق ونەرىمەن بايلانىستىرۋدى كوزدەپ وتىر. ونىڭ ارمانى - اقتاۋداعى ونەر كوللەدجىندە ءبىلىم الۋ.
ەسكە سالا كەتەلىك، بۇدان بۇرىن اتىراۋلىق كارىس قىزى قازاق تىلىنە باۋىر باسىپ، قازاق جىگىتىنە تۇرمىسقا شىققانىن ايتقان ەدى.
