ۇيىمىزدە بارلىعى قازاقشا سويلەيدى - قاراعاندىلىق ۇستاز
سۆەتلانا كرۋمەنت قاراعاندى قالاسىنىڭ تاتتىمبەت اتىنداعى ونەر كوللەدجىندە تاريح پانىنەن قازاق تىلىندە ساباق بەرەدى. ۇستازدىڭ ۇستانىمى مىقتى. حالقىمىزدىڭ اۋىز ادەبيەتى، سالت- ءداستۇرى، ادەت-عۇرپىن دارىپتەۋدى ستۋدەنتتەر ساناسىنا ءسىڭىرىپ كەلەدى.
«كوبىنەسە يننوۆاتسيالىق تەحنولوگيالاردى قولدانامىز. ويتكەنى، بۇل ءتاسىل بالالارعا جاقىن. ولار تەلەفون، نوۋتبۋك سەكىلدى ءتۇرلى گادجەتتەرمەن جۇمىس ىستەۋگە ۇيرەنىپ قالعان. سوندىقتان، بالالارعا بارلىعى تۇسىنىكتى بولۋى ءۇشىن سولاردى قولدانامىز. سونىمەن قاتار، ويىن تۇرىندە دە ساباق وتكىزەمىز»، - دەيدى سۆەتلانا كرۋمەنت.
سۆەتلانا فاديسوۆنا قارقارالى اۋدانىنىڭ تۋماسى. كەيىپكەرىمىزدىڭ اكەسى - تاتار، اناسى - ورىس. مەكتەپتە، ۋنيۆەرسيتەتتە ورىس بولىمىندە وقىعان. الايدا، مەملەكەتتىك تىلگە انا تىلىنەن كەم قاراعان ەمەس.
«نەگىزى مەنىڭ ءتىلىم ەكى تىلدە شىققان. اكە- شەشەمنىڭ ايتۋىنشا، مەن كىشكەنتايىمنان قازاق جانە ورىس ءتىلىن قاتار الىپ جۇرگەن ەكەنمىن. ۇيىمىزدە بارلىعى قازاقشا سويلەي الادى»، - دەيدى ول.
قازىر سۆەتلانا كرۋمەنت - نەمىس ۇلتىنىڭ كەلىنى. قوناق كۇتۋگە بەيىم. ۇياسىندا كورگەن تاربيەسى سونداي. قوناق - قۇت، ريزىق، بەرەكەسىن الا كەلەدى دەپ پايىمدايدى. داستارحانىنىڭ باستى اسى - ەت.
«جولداسىمنىڭ جاقسى كورەتىن تاعامى - ەت. ۇلتى نەمىس بولسا دا، باسقا دا ءتۇرلى تاعامداردى دايىنداپ وتىرساق تا، ءاردايىم ەت - ءبىزدىڭ وتباسىمىزدا داستارحانىمىزدىڭ نەگىزگى اسى»، - دەيدى ول.
سونىمەن بىرگە، قازاق ىرىمىنا سەنەدى جانە ونى رۋحاني تەگىنە جاقىن ۇستاعىسى كەلەدى. ۇلى دۇنيەگە كەلگەن ساتتەن باستاپ، قازاق داستۇرىنە سايكەس بارلىق ءجون-جورالعىنى جاساپ كەلەدى.
