كۇن سايىن ادامدارعا كومەك قولىن سوزعىم كەلەدى - ەلميرا ساقالوۆا

استانا. قازاقپارات - ەلىمىزدە مەملەكەتتىك قىزمەت پەن ۆولەنتەرلىكتى قاتار اتقارىپ، قوعامعا زور پايداسىن تيگىزىپ جۇرگەن جاندار بار. سونىڭ ءبىرى - پارلامەنتاريزم ينستيتۋتىنىڭ قىزمەتكەرى ەلميرا ساقالوۆا، دەپ حابارلايدى قازاقپارات ءتىلشىسى.

«ماماندىعىم - زاڭگەر. ۇزاق ۋاقىت بويى سوتتا، PwC كومپانياسىندا جۇمىس ىستەدىم. بۇگىندە پارلامەنتاريزم ينستيتۋتىندا قىزمەت ەتەمىن. بۇل ماماندىققا تاڭداۋ جاساۋداعى باستى سەبەپتەردىڭ ءبىرى ەڭ مىقتى ءبىلىم - زاڭ بىلىمىمەن ءوزىڭنىڭ جان-جاقتى قارۋلانعانىڭدى سەزىنۋ. قازىرگى ۋاقىتتا كۇندەلىكتى ومىردەگى بارلىق سالادا ءوزىڭنىڭ ءىس- ارەكەتىڭە دۇرىس قۇقىقتىق باعا بەرە ءبىلۋ وتە ماڭىزدى. جالپى، جۇمىسىم قاتتى ۇنايدى، قىزىقتى ءبىز دەپۋتاتتاردىڭ سۇراۋى بويىنشا شەت مەملەكەتتەردىڭ زاڭناماسىنا سالىستىرمالى تالداۋ جاسايمىز. ولاردىڭ تاجىريبەسىن، كەيبىر ماسەلەلەردى الەمدىك قاۋىمداستىق قالاي شەشەتىنىن قاراستىرامىز. ەڭ جاقسى تاجىريبەنى تاڭداپ، دەپۋتاتتاردىڭ قاراۋىنا ۇسىنىس جىبەرەمىز»، - دەدى ەلميرا ساقالوۆا.

بۇگىندە ول نەگىزىگى جۇمىسىمەن قاتار ۆولەنتەرلىكپەن دە اينالىسادى. قوعامعا پايداسىن تيگىزۋدى باستى ماقساتى سانايدى.

«نەگىزىنەن جاعدايلىق جانە الەۋمەتتىك ۆولونتەرلىكپەن اينالىسامىن. ياعني، ادامدارمەن تىعىز- قارىم- قاتىناستا بولامىن. قازىرگى ۋاقىتتا دەنساۋلىعىنىڭ مۇمكىندىگى شەكتەۋلى ادامدارعا، بالالارعا جان- جاقتى كومەك كورسەتىپ، قالالىق ءتۇرلى ءىس- شارالاردى، اكتسيالاردى ۇيىمداستىرۋعا قاتىسامىن. وسى سالادا جاڭا ءبىلىم الۋ، سونىمەن قاتار وزگە قالالارداعى ۆولەنتەرلىك ۇيىمدارمەن ارادا تاجىريبە الماسۋ ءۇشىن ەرىكتىلەر فورۋمىنا قاتىسىپ تۇرامىن. ءومىرىم جارقىن ءارى قىزىقتى بولا ءتۇستى. كۇننەن سايىن ادامدارعا كومەك قولىن سوزعىم كەلەدى. بۇعان قوسا مول جۇمىس تاجىريبەسىن الىپ، جاڭا ءبىلىم الۋعا ۇمتىلامىن. ومىرگە نىق سەنىممەن قاراۋعا ۇيرەنەمىن. ۆولونتەرلىكپەن ەرىكتە تۇردە اينالىسىپ ءجۇرمىن. ويتكەنى، ءار ءىسىمنىڭ بارلىق ۋاقىتتا دا ناتيجەسى بولادى»، - دەدى ۆولەنتەر.

ەلميرا جاراس قىزى 2019-جىلى «استانا كومەك قورى» قايىرىمدىلىق قورىنىڭ نەگىزىن قالادى.

«ەرەكشە قاجەتتىلىگى بار بالالارعا كومەك قولىن سوزامىز. ازىق-تۇلىك سەبەتىمەن كومەكتەسىپ، كوپبالالى وتباسىلاردان شىققان بالالاردىڭ مەكتەپكە بارۋى ءۇشىن قاجەتتى زاتتارىن الىپ بەرەمىز. ءتىپتى ىندەت ءورشىپ تۇرعان كەزدىڭ وزىندە دە مۇقتاج جاندارعا ازىق- تۇلىك، ءدارى- دارمەك جەتكىزىپ بەرۋمەن اينالىستىق. وسىدان كەيىن ۋاقىت وتە كەلە انالار كومەك سۇراي باستادى. سوندىقتان 2020-جىلى «كاسىپكەر انا قازاقستان» قوعامدىق قورىن اشىقتىق. قوردىڭ نەگىزگى ماقساتى - حالىقتىڭ وسال توبىنان شىققان انالاردى ۇيدە وتىرىپ جۇمىس ىستەۋى جانە ءوز ءىسىن دامىتۋى ءۇشىن ءتۇرى ماماندىق بويىنشا شەبەرلىككە، داعدىعا ۇيرەتۋ. بۇگىندە كوپتەگەن العىس حات الىپ، قوعام تاراپىنان جىلى پىكىر، ىزگى تىلەك، ريزاشىلىق ەستىدىم. ال بۇل جايت جۇرەگىڭە جىلۋ سىيلايدى»، - دەدى ەلميرا ساقالوۆا.