نوبەل سىيلىعىنىڭ لاۋرەاتى مەملەكەتتىك باسقارۋ اكادەمياسىندا ءدارىس وقىدى

استانا. قازاقپارات - نوبەل سىيلىعىنىڭ لاۋرەاتى رە كۆون چۋنگ «اشىق ۇكىمەت جانە باسقارۋدىڭ جاڭا مادەنيەتى: ەستۋ، ءتۇسىنۋ، ارەكەت ەتۋ» حالىقارالىق عىلىمي-پراكتيكالىق كونفەرەنتسياسى بارىسىندا قاتىسۋشىلارعا ءدارىس وقىدى، دەپ حابارلايدى قازاقپارات ءتىلشىسى.

پروفەسسور Net Zero تەحنولوگياسى مەن جاسىل ەنەرگەتيكا سالاسىنداعى زەرتتەۋلەرىمەن جانە تاجىريبەسىمەن ءبولىستى. ونىڭ پىكىرىنشە، «ەنەرگەتيكالىق اۋىسۋ» ءۇشىن قوعامدىق كولىككە «جاسىل ينۆەستيتسيا»، ەكولوگيالىق سالىق رەفورماسى، تومەن كومىرتەكتى جاسىل ءوسۋ ستراتەگياسى جانە تۇتىنۋشىلاردىڭ ەرىكتى قاتىسۋ جۇيەسى قاجەت. بۇل رەتتە، تۇتىنۋشىلاردىڭ ءبىلىمىن ارتتىرۋ جانە وي-پايىمىن وزگەرتۋ بويىنشا الەۋمەتتىك ناۋقان ماڭىزدى. سونداي-اق، جاڭارتىلاتىن ەنەرگيا كوزدەرىن ەرىكتى تۇردە تۇتىنۋ جانە كومىرتەگى شىعارىندىلارىن تولەۋ جۇيەسىن ازىرلەۋ كەرەك. دەمەك، تۇتىنۋشىلار جاڭارتىلاتىن ەنەرگيانى ءوز ەركىمەن ساتىپ الىپ، وزدەرىنىڭ قوساتىن جەكە ۇلەستەرىن انىقتاي الادى.

«قازىرگى تاڭدا سىزدەر قىسقا مەرزىمدى ناتيجەلەرگە قول جەتكىزۋ ءۇشىن «اشىق ۇكىمەت» قۇرۋ باعىتىندا جۇمىس ىستەپ جاتىرسىزدار. دەگەنمەن، ۇزاق مەرزىمدى ماسەلەلەردى دە ەسكەرگەن ءجون. ويتكەنى، ولار قىسقا مەرزىمدى ناتيجەلەرگە اسەر ەتۋى مۇمكىن. بۇل ماسەلەنى «جاسىل ءوسۋ» تۇجىرىمداماسى ارقىلى شەشۋدى ۇسىنامىن. وسى تۇجىرىمداما اياسىندا كليماتتىق قىزمەتتىڭ قارجىلىق جانە تەحنولوگيالىق اسپەكتىلەرىنە نازار اۋدارىپ، بەلسەندى ازاماتتاردىڭ قاتىسۋىمەن قوعامدا اشىق كوشباسشىلىقتى دامىتۋ قاجەت. مەملەكەتتىك ساياساتتى قوعامنىڭ قولداۋىنسىز جۇزەگە اسىرۋ مۇمكىن ەمەس جانە كليماتتىق ءىس-شارالاردى قابىلداۋعا ۇكىمەتپەن قاتار، بيزنەس-قۇرىلىمدار دا جاۋاپتى بولۋى كەرەك. سونىمەن قاتار، قاراپايىم تۇتىنۋشى ازاماتتارعا قولداۋ كورسەتۋ دە وتە ماڭىزدى. ويتكەنى، بۇل جوبادا ۇكىمەت قارجىلىق رەسۋرستارمەن شەكتەلىپ قالۋى مۇمكىن. ماسەلەنى شەشۋ ءۇشىن تۇراقتى جانە ەكولوگيالىق ءوسۋدى قامتاماسىز ەتۋ ماقساتىندا تەحنولوگيالىق يننوۆاتسيالاردى، ەكونوميكالىق جانە الەۋمەتتىك ساياساتتى ينتەگراتسيالاۋ قاجەت»، - دەدى پروفەسسور چۋنگ.