باس پروكۋراتۋرا سەرىك كۇدەبايەۆ تالدىقورعان قالاسىندا قانداي زاڭسىزدىقتارعا جول بەرگەنىن ايتتى
تالدىقورعان قالالىق سوتىنىڭ ۇكىمىمەن س. م. كۇدەبايەۆ «قاڭتار وقيعالارى» كەزەڭىندە اۋىر زارداپتارعا (ق ك- ءنىڭ 362-بابى 4-بولىگى) جانە ازاپتاۋلارعا (146-بابى 2-بولىگى) اكەپ سوققان بيلىكتى اسىرا پايدالانعانى ءۇشىن كىنالى دەپ تانىلىپ، ورتاشا قاۋىپسىزدىك مەكەمەسىندە جازاسىن وتەي وتىرىپ، پوليتسيا گەنەرال مايورى ارنايى اتاعىنان ايىرىلا وتىرىپ، 10 جىلعا باس بوستاندىعىنان ايىرىلدى.
س. م. كۇدەبايەۆ قازاقستان رەسپۋبليكاسى كونستيتۋتسياسىنىڭ، مەملەكەت باسشىسىنىڭ «توتەنشە جاعداي ەنگىزۋ تۋرالى» جارلىعىنىڭ، «قۇقىق قورعاۋ قىزمەتى تۋرالى» جانە «ىشكى ىستەر ورگاندارى تۋرالى» زاڭدارىنىڭ نورمالارىن بۇزىپ، سونداي-اق ۆەدومستۆوىشىلىك بۇيرىقتار مەن ارنايى جوسپارلاردىڭ تالاپتارىن ورىنداماعان.
شابۋىل بەلگىلەرى بولماعان جاعدايدا، توتەنشە جاعداي كەزىندە قوعامدىق قاۋىپسىزدىكتى قامتاماسىز ەتۋدىڭ ورنىنا، س. م. كۇدەبايەۆ جەكە قۇرامعا عيماراتتان كەتۋگە جانە ۇيلەرىنە تاراۋعا زاڭسىز بۇيرىق بەرىپ، قىزمەتكەرلەردىڭ رايىن قايتارعان.
جەرگىلىكتى جەردىڭ كومەندانتى رەتىندە جەدەل شتابتىڭ ءتيىستى جۇمىسىن جانە ايماقتاعى جاعدايدى تۇراقتاندىرۋ بويىنشا ۋاقتىلى شارالار قابىلداۋدى قامتاماسىز ەتپەگەن.
ناتيجەسىندە تالدىقورعان قالاسىندا حاوس پەن بيلىكسىزدىككە جول بەردى. توناۋشىلار ساۋدا ۇيلەرى مەن بيزنەس نىساندارىن تونادى. بانكوماتتار مەن سۋپەرماركەتتەردىڭ دۇڭگىرشەكتەرىن قيراتىپ، وبلىس اكىمدىگى، «نۇر وتان» پارتياسى عيماراتتارىنا شابۋىل جاساپ، ورتەدى.
قىلمىسكەرلەر قۇقىقتىق ءتارتىپ كۇشتەرى بولماعان كەزدە جازاسىزدىق پەن رۇقسات ەتىلگەندىكتى سەزىنىپ، وبلىس پوليتسيا دەپارتامەنتى مەن تالدىقورعان قالاسى پوليتسيا باسقارماسىنىڭ عيماراتتارىن باسىپ الدى، ولاردىڭ 500 گە جۋىق قارۋى مەن 28 مىڭنان استام وق-ءدارىسىن ۇرلاعان، ولاردىڭ ءبىر بولىگى ءالى تابىلعان جوق.
مەملەكەتكە، ازاماتتارعا جانە كاسىپكەرلەرگە كەلتىرىلگەن زالالدىڭ جالپى سوماسى شامامەن 5 ميلليارد تەڭگەنى قۇرادى.
2022-جىلعى 7-16- قاڭتار ارالىعىندا ونىڭ ءۇنسىز كەلىسىمىمەن پوليتسيا دەپارتامەنتىنىڭ عيماراتىندا 23 ازاماتقا قاتىستى جاپپاي ازاپتاۋ قولدانىلدى.
سونىمەن قاتار، س. م. كۇدەبايەۆتىڭ كوز الدىندا ونىڭ قارماعىنداعىلار دەپارتامەنت اۋماعىنا جەتكىزىلگەن ادامداردى ۇرىپ-سوققاندىعى بەينەكامەرالارعا جازىلعان.
پسيحيكالىق جانە فيزيكالىق زورلىق-زومبىلىقپەن، سونداي-اق بۋ ۇتىكتى قولدانۋمەن قاتار جۇرەتىن تىيىم سالىنعان تەرگەۋ ادىستەرىنىڭ ناتيجەسىندە اتالعان ازاماتتاردىڭ دەنساۋلىعىنا ءار ءتۇرلى دارەجەدەگى زيان كەلتىرگەن.
س. م. كۇدەبايەۆتىڭ كىناسى قىلمىستىق ءىس بويىنشا جينالعان دالەلدەمەلەر جيىنتىعىمەن تولىق دالەلدەندى.
ايتا كەتەيىك، كەشە سەرىك كۇدەبايەۆ بيلىك پەن لاۋازىمدىق وكىلەتتىلىگىن پايدالانۋ، ازاپتاۋ باپتارى بويىنشا كىنالى دەپ تابىلىپ، 10 جىلعا باس بوستاندىعىنان ايىرىلدى. ول جازاسىن قاۋىپسىزدىگى ورتاشا تۇزەۋ مەكەمەسىندە وتەيدى. سونداي-اق، كۇدەبايەۆ 10 جىل بويى مەملەكەتتىك قىزمەتتە جۇمىس ىستەۋ قۇقىعىنان ايىرىلدى. سۋديا ونى بارلىق مەملەكەتتىك ناگرادالارىنان ايىرۋ جونىندە ۇسىنىس ەنگىزدى. بۇعان دەيىن ايىپتالۋشى سەرىك كۇدەبايەۆ كىنالى ەمەستىگىن ايتتى.
ايتا كەتەيىك، سەرىك كۇدەبايەۆ 2020-جىلدان باستاپ 2022-جىلدىڭ قاڭتارىنا دەيىن الماتى وبلىسى پوليتسيا دەپارتامەنتىنىڭ باستىعى قىزمەتىن اتقاردى. سول لاۋازىمىن اتقارۋ كەزىندە قاڭتار وقيعاسى بويىنشا كۇدىكتى دەپ تانىلعان.
