الماتىدا وتەتىن ەۋرووداق-قازاقستان ەكونوميكالىق فورۋمىنا كيپردىڭ ىسكەر توپتارى قاتىسپاق

نيكوسيا. قازاقپارات - قازاقستان ەلشىسى ساتىبالدى بۇرشاكوۆ كيپر پرەزيدەنتى نيكوس حريستودۋليديسپەن كەزدەستى، دەپ حابارلايدى قازاقپارات سىرتقى ىستەر مينيسترلىگىنىڭ رەسمي سايتىنا سىلتەمە جاساپ.

قازاقستان ەلشىسى ساتىبالدى بۇرشاكوۆ كيپر پرەزيدەنتى نيكوس حريستودۋليديسپەن اڭگىمەلەسۋ بارىسىندا پرەزيدەنت قاسىم-جومارت توقايەۆتىڭ قۇتتىقتاۋ حاتىن جەتكىزدى. مەملەكەت باسشىسىنا ىزگى تىلەكتەرىن جولداعان ن. حريستودۋليديس ەكىجاقتى قارىم-قاتىناستاردىڭ دەڭگەيىن جوعارى باعالاپ، بولاشاقتا قازاقستانعا ساپارمەن بارۋعا قىزىعۋشىلىق تانىتتى.

بۇدان بولەك، نيكوسياعا ساپارى بارىسىندا س. بۇرشاقوۆ كيپردىڭ جاڭا ۇكىمەت مۇشەلەرى - ادىلەت جانە قوعامدىق ءتارتىپ ءمينيسترى اننا كۋككيديس- پروكوپيۋمەن جانە ەنەرگەتيكا، ساۋدا جانە ونەركاسىپ ءمينيسترى يورگوس پاپاناستاسيۋمەن كەلىسسوزدەر جۇرگىزدى. ديپلومات كيپر رەسمي وكىلدەرىن قازاقستانداعى اۋقىمدى ساياسي جانە ەكونوميكالىق رەفورمالاردىڭ جۇزەگە اسىرىلۋى، سونداي-اق جۋىردا وتكەن پارلامەنتتىك سايلاۋدىڭ ناتيجەلەرى تۋرالى حاباردار ەتتى.

ا. كۋككيديس-پروكوپيۋمەن كەزدەسۋدە كيپر تاراپى ەلشىگە 2022-جىلى ەلدەرىمىز اراسىندا قول قويىلعان ءوزارا قۇقىقتىق كومەك جانە ەكستراديتسيالاۋ تۋرالى شارتتاردى وكىلدەر پالاتاسىندا راتيفيكاتسيالاعانى جايلى مالىمدەدى. سونداي-اق، قازاقستان-كيپر ىنتىماقتاستىعىنىڭ شارتتىق-قۇقىقتىق بازاسىن ودان ءارى كەڭەيتۋ تۋرالى ۋاعدالاستىققا قول جەتكىزىلدى.

ەنەرگەتيكا، ساۋدا جانە ونەركاسىپ مينيسترلىگىندە الداعى مامىردا الماتىدا وتەتىن ەۋرووداق-قازاقستان ەكونوميكالىق فورۋمى اياسىندا ەكونوميكالىق ىنتىماقتاستىقتىڭ كۇن ءتارتىبى مەن ەلىمىزدىڭ ينۆەستيتسيالىق الەۋەتى تالقىلاندى. مينيستر ي. پاپاناستاسيۋ الماتىعا ساپارى بارىسىندا قازاقستاندىق جانە كيپرلىك كاسىپكەرلەردىڭ قاتىسۋىمەن وتەتىن بيزنەس-كونفەرەنسياعا قاتىساتىن ىسكەر توپتاردىڭ دەلەگاتسياسىن باسقارادى دەپ جوسپارلانعان.