مەملەكەتتىك كەڭەسشى قوجا احمەت ياساۋي كەسەنەسىنىڭ ماسەلەلەرى جونىندە كەڭەس وتكىزدى

تۇركىستان. قازاقپارات – ق ر پرەزيدەنتىنىڭ تاپسىرماسىنا سايكەس مەملەكەتتىك كەڭەسشى ەرلان قارين يۋنەسكو جانە يسەسكو ىستەرى جونىندەگى ۇلتتىق كوميسسيا شەڭبەرىندە قوجا احمەت ياساۋي كەسەنەسىن ساقتاۋ جانە ونىڭ تەحنيكالىق احۋالى جونىندە كەڭەس وتكىزدى.

قازاقپارات بۇل تۋرالى اقورداعا سىلتەمە جاساپ حابارلايدى.

جيىن بارىسىندا ەرلان قارين مەملەكەتتىك ورگاندار جانە ساراپشىلار قاۋىمداستىعىنىڭ وكىلدەرىمەن بىرگە كەسەنەنىڭ بۇگىنگى جاي-كۇيىمەن تانىسىپ شىقتى.

تۇركىستان وبلىسى اكىمدىگىنىڭ، مادەنيەت جانە سپورت مينيسترلىگىنىڭ، يۋنەسكو جانە يسەسكو ىستەرى جونىندەگى ۇلتتىق كوميسسيانىڭ وكىلدەرى، ارحەولوگيا جانە تاريحي-مادەني مۇراعا جاتاتىن ەسكەرتكىشتەرى ساقتاۋ باعىتىنداعى ماماندار قاتىسقان كەڭەستە كەسەنەنى ساقتاۋ جانە دامىتۋ بويىنشا كەشەندى جوسپارىنىڭ ورىندالۋى، 2023-جىلعا جوسپارلانعان جۇمىستاردىڭ جوباسى، يۋنەسكونىڭ دۇنيەجۇزىلىك مۇرا كوميتەتىنىڭ 45-سەسسياسىنا دايىندىق ماسەلەلەرى قارالدى.

مەملەكەتتىك كەڭەسشى ەسكەرتكىشتى دۇرىس ساقتاۋ باستى مىندەت ەكەنىن اتاپ ءوتتى. وسىعان وراي، مەملەكەتتىك ورگاندارعا ساراپشىلار قاۋىمداستىعىمەن تىعىز ارەكەت ەتە وتىرىپ، كەسەنەنىڭ جاعدايىن ۇنەمى باقىلاۋدا ۇستاۋ تاپسىرىلدى.

ايتا كەتەيىك، 20- ءساۋىر كۇنى ءماجىلىس دەپۋتاتى ماقسات تولىقباي مەملەكەتىمىزدىڭ بويتۇمارىنا اينالعان قوجا احمەت ياساۋي كەسەنەسىنىڭ بۇگىنگى مۇشكىل جاعدايىنا وراي پرەمەر-ءمينيستردىڭ ورىنباسارى التاي كولگىنوۆتىڭ اتىنا دەپۋتاتتىق ساۋال جولداعان ەدى.