قازاقستاننىڭ ۇلتتىق پاركتەرىندە مۇگەدەكتىگى بار ادامدار ءۇشىن قولايلى جاعداي جاسالادى

استانا. قازاقپارات - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا مەن قازاقستانداعى ب ۇ ۇ دامۋ باعدارلاماسىنىڭ تۇراقتى وكىلى كاتارجينا ۆاۆەرنيانىڭ كەزدەسۋى بارىسىندا مۇگەدەكتىگى بار ادامدار ءۇشىن ۇلتتىق پاركتەردەگى قولجەتىمدىلىكتى كەڭەيتەتىن وتىنىشكە قول قويىلدى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

تاراپتار 2021-2023-جىلدارعا ارنالعان «حالىقتىڭ الەۋمەتتىك وسال توپتارى ءۇشىن الەۋمەتتىك قورعاۋ جانە بەلسەندىرۋ باعدارلامالارىنىڭ تيىمدىلىگى مەن قولجەتىمدىلىگىن ارتتىرۋ» اتتى بىرلەسكەن جوباسى شەڭبەرىندەگى ىنتىماقتاستىقتى تالقىلادى.

تامارا دۇيسەنوۆا ۆاۆەرنيا كاتارجينانى ب ۇ ۇ د ب- نىڭ قازاقستانداعى تۇراقتى وكىلى بولىپ تاعايىندالۋىمەن قۇتتىقتاپ، كوپجىلدىق سىندارلى ىنتىماقتاستىقتىڭ ماڭىزدىلىعىن اتاپ ءوتتى.

«بىرنەشە جىل بويى ب ۇ ۇ د ب- نىڭ قاتىسۋىمەن جانە قولداۋىمەن مينيسترلىك كەدەيلىك پروبلەمالارىن شەشۋگە، مۇگەدەكتىگى بار ادامداردى الەۋمەتتىك قورعاۋ جۇيەسىن جەتىلدىرۋگە جانە ارناۋلى الەۋمەتتىك قىزمەتتەردى ەنگىزۋگە باعىتتالعان 4 ءىرى بىرلەسكەن جوبانى ىسكە اسىردى.

مەملەكەتىمىزدىڭ الەۋمەتتىك ساياساتىنىڭ ماڭىزدى باعىتتارىنىڭ ءبىرى - مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە قورعاۋ. بۇۇدب قولداۋىمەن بۇۇ- نىڭ مۇگەدەكتەردىڭ قۇقىقتارى تۋرالى كونۆەنتسياسىنىڭ نورمالارىن راتيفيكاتسيالاۋ جانە يمپلەمەنتاتسيالاۋ، مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپاردى ىسكە اسىرۋ، الەۋمەتتىك قىزمەتتەر پورتالىن ازىرلەۋ جانە ەنگىزۋ جانە باسقا دا كوپتەگەن باستامالار بويىنشا جۇمىستار جۇرگىزىلدى.

وسى جىلدىڭ 26- ساۋىرىندە پارلامەنت ءماجىلىسىنىڭ جالپى وتىرىسىندا ب ۇ ۇ- نىڭ مۇگەدەكتەردىڭ قۇقىقتارى تۋرالى كونۆەنتسياسىنا فاكۋلتاتيۆتىك حاتتامانى راتيفيكاتسيالاۋ بويىنشا زاڭ جوباسى قابىلداندى»، - دەدى مينيستر.

سونداي-اق، مينيستر 2021-2023-جىلدارعا ارنالعان «حالىقتىڭ الەۋمەتتىك وسال توپتارى ءۇشىن الەۋمەتتىك قورعاۋ جانە بەلسەندىرۋ باعدارلامالارىنىڭ تيىمدىلىگى مەن قولجەتىمدىلىگىن ارتتىرۋ» بىرلەسكەن جوباسىن ىسكە اسىرۋدىڭ جانە ب ۇ ۇ د ب- مەن وتباسىنىڭ سيفرلىق كارتاسى جانە ق ر الەۋمەتتىك كودەكسىنىڭ جوبالارىن ازىرلەۋ بويىنشا بەلسەندى ىنتىماقتاستىقتىڭ ماڭىزدىلىعىنا توقتالدى.

«2023-جىلدىڭ 1- قاڭتارىنان باستاپ وتباسىنىڭ سيفرلىق كارتاسى ەنگىزىلدى، ول قازاقستاندىقتاردىڭ مەملەكەتتىك قولداۋ جۇيەسىنە تەڭ قولجەتىمدىلىگىن قامتاماسىز ەتەدى جانە الەۋمەتتىك ساياساتتىڭ ورتا جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى بولادى.

وسى جىلعى 20- ساۋىردە مەملەكەت باسشىسى جاڭا الەۋمەتتىك كودەكسكە قول قويدى، ونىڭ نەگىزگى مىندەتى ازاماتتاردىڭ ءومىر ءسۇرۋ ساپاسىن جاقسارتۋ ءۇشىن ءبىرىڭعاي قۇقىقتىق نەگىز قۇرۋ بولىپ تابىلادى»، - دەدى تامارا دۇيسەنوۆا.

ءوز كەزەگىندە، كاتارجينا ۆاۆەرنيا بىرلەسىپ ىسكە اسىرىلىپ جاتقان جوبالاردىڭ ناتيجەلىلىگىن اتاپ ءوتىپ، ودان ءارى جەمىستى ەكىجاقتى ىنتىماقتاستىققا دايىن ەكەندىگىن ءبىلدىردى.

كەزدەسۋ سوڭىندا تامارا دۇيسەنوۆا ەڭبەكمينى، ەكولوگيا مينيسترلىگى جانە ب ۇ ۇ د ب اراسىنداعى مۇگەدەكتىگى بار ادامداردىڭ قاجەتتىلىكتەرىن ەسكەرە وتىرىپ، ۇلتتىق پاركتەردىڭ تۋريستىك قىزمەتىن دامىتۋداعى ينكليۋزيۆتى تاسىلدەردى ىلگەرىلەتۋ جونىندەگى ىنتىماقتاستىق نيەتتەرى تۋرالى ءۇشجاقتى مالىمدەمەگە قول قويدى. ونى ىسكە اسىرۋ ارقىلى قازاقستاننىڭ ۇلتتىق ساياباقتارىندا ەرەكشە قاجەتتىلىكتەرى بار ادامدار ءۇشىن قولجەتىمدىلىك كەڭەيەدى.