سپورتشىلارى جۇلدەلى ورىن العان باپكەرلەرگە ىنتالاندىرۋ تولەماقىسى تولەنەدى
بۇل جايىندا مادەنيەت جانە سپورت ءمينيسترى اسحات ورالوۆ ءمالىم ەتتى، دەپ حابارلايدى قازاقپارات.
ونىڭ ايتۋىنشا، قۇجاتتا ەلىمىزدە وسى سالالاردى دامىتۋدىڭ جاڭا باعىتىن ايقىندادىق، بۇقارالىق سپورتقا، ونىڭ ىشىندە بالالار مەن جاستار اراسىندا، ازاماتتاردىڭ بارلىق ساناتتارى ءۇشىن دەنە شىنىقتىرۋ جانە سپورتپەن شۇعىلدانۋدىڭ جالپىعا قولجەتىمدىلىگىنە، دەنە شىنىقتىرۋعا، اۋەسقوي جانە كاسىپتىك سپورتقا تەڭ كوزقاراسقا، جوعارى جەتىستىكتەر سپورتىن جانە بەيىمدەلگىش سپورتتى دامىتۋعا باسا نازار اۋدارىلعان.
«مىسالى، 2029-جىلعا دەيىن جىل سايىن ەلىمىز بويىنشا 20 مىڭنان استام سپورتتىق-بۇقارالىق ءىس-شارا وتكىزۋگە نيەتتىمىز. ال اۋىلدىق جەرلەردە وسى باعىتتى دامىتۋ ءۇشىن اۋىلداعى سپورت نۇسقاۋشىلارىنىڭ سانى 4 مىڭعا دەيىن ۇلعايادى. مەكتەپتەر مەن جوعارى وقۋ ورىندارىنىڭ جانىنان تۇراقتى نەگىزدە جۇمىس ىستەيتىن سپورت كلۋبتارى مەن كوماندالار قۇرىلادى. ولاردىڭ اراسىندا اۋداندىق، وبلىستىق جانە رەسپۋبليكالىق جارىستار وتەدى. حالىقتىڭ بەلگىلى ءبىر توبى: ەرەكشە قاجەتتىلىگى بار ادامدار، مەملەكەتتىك قىزمەتشىلەر، مەديتسينا قىزمەتكەرلەرى، ب ا ق وكىلدەرى، قارجى قۇرىلىمدارى جانە ت. ب. اراسىندا سپارتاكيادالار ۇيىمداستىرىلادى. پرەزيدەنتتىك تەستىلەردىڭ نورماتيۆتەرى جاڭارتىلدى. اتاپ ايتقاندا، سپورت تۇرلەرى ازايدى، ال ولاردى تاپسىرعان ازاماتتارعا ارنايى سەرتيفيكات بەرىلەدى. ەگدە جاستاعى قازاقستاندىقتارعا ەرەكشە كوڭىل بولىنەدى. ءار ءتۇرلى جاستاعى ازاماتتاردى قامتيتىن «قولجەتىمدى سپورت» جوباسىن ىسكە اسىرۋ جالعاسادى. ەلىمىزدىڭ بارلىق وڭىرلەرىندە سكانديناۆيالىق ءجۇرىس، يوگا جانە ت. ب. ساباقتار ۇيىمداستىرىلادى» دەپ جازدى اسحات ورالوۆ Telegram پاراقشاسىندا.
ۇلتتىق سپورت تۇرلەرىن ناسيحاتتاۋعا سپورتتىق- بۇقارالىق ءىس-شارالاردى، ونىڭ ىشىندە اۋىلدىق جەرلەردە وتكىزۋ ارقىلى قول جەتكىزىلەدى.
مىسالى ەلىمىزدە V دۇنيەجۇزىلىك كوشپەندىلەر ويىندارى وتەدى.
قازاقستاننىڭ سولتۇستىك وڭىرلەرىندە ۇلتتىق سپورت تۇرلەرىن دامىتۋعا ەرەكشە نازار اۋدارىلادى.
113 جاڭا سپورت نىسانىن سالۋ، 20 سىن جاڭارتۋ جانە جۇمىس ىستەپ تۇرعان 6 سپورت نىسانىن قايتا جاراقتاندىرۋ جۇمىسى جالعاسادى.
اۋىلدىق جەرلەردە شاعىن بيۋجەتتى جازىقتىق سپورت قۇرىلىستارىنا جانە مودۋلدىك ۇلگىدەگى از شىعىندى، تەز سالىناتىن سپورت كەشەندەرىنە باسىمدىق بەرىلەدى.
سونداي-اق، مينيسترلىك جۇمىس ىستەپ تۇرعان دەنە شىنىقتىرۋ-ساۋىقتىرۋ جانە سپورت عيماراتتارىنا تۇگەندەۋ جۇرگىزەدى.
بيزنەستى سپورتتىق ينفراقۇرىلىم سالۋعا ىنتالاندىرۋ جونىندەگى شارالار ازىرلەنبەك. مىسالى، نىساندى سالۋ شىعىندارىنىڭ ءبىر بولىگىن وتەۋ.
ءمينيستردىڭ ايتۋىنشا، وليمپيادالىق رەزەرۆتى دايىنداۋ ماقساتىندا بۇكىل ەل بويىنشا جاتتىعۋ ورتالىقتارى قۇرىلادى، وندا جىل بويى جەتەكشى سپورتشىلار دا، باسىم سپورت تۇرلەرى بويىنشا بارلىق دارىندى سپورتشىلار دا دايىندالادى.
بۇل ورتالىقتاردا جۇمىس ىستەۋگە عىلىمي قىزمەتكەرلەر دە تارتىلادى. ال وبلىستاردىڭ جانە رەسپۋبليكالىق ماڭىزى بار قالالاردىڭ قۇراما كوماندالارىن دايىنداۋ ءۇشىن قازاقستاننىڭ بارلىق وڭىرلەرىندە استانانىڭ ۇلگىسىمەن وليمپيادالىق جانە وليمپيادالىق ەمەس تۇرلەر بويىنشا سپورتتى دامىتۋ ديرەكتسياسىن قۇرۋ جوسپارلانىپ وتىر.
جاتتىقتىرۋشى - وقىتۋشىلارعا سپورتشىلاردىڭ جوعارى ناتيجەسى جانە ولاردى سپورتتىق دايىندىقتىڭ كەلەسى كەزەڭىنە بەرگەنى ءۇشىن ىنتالاندىرۋ تولەمدەرى ەنگىزىلەدى، بۇل جاس تالانتتاردىڭ العا جىلجۋىنا كومەكتەسەدى، ال ماماندارعا قوسىمشا موتيۆاتسيا بەرەدى.
الداعى جازعى جانە قىسقى وليمپياداعا دايىندىق ماقساتىندا «پاريج-2024» جانە «ميلان-2026» باعدارلامالارى ىسكە اسادى، ونىڭ شەڭبەرىندە سپورتشىلارعا جان-جاقتى قولداۋ كورسەتىلەدى.
«سپورتتىق مەديتسينانى دامىتۋعا ەرەكشە كوڭىل بولىنەدى. ەلىمىزدە سپورتشىلاردى وڭالتۋعا جانە قالپىنا كەلتىرۋگە ارنالعان وڭىرلىك دارىگەرلىك-دەنە شىنىقتىرۋ ديسپانسەرلەرىنىڭ بولىمشەلەرىن اشۋ بويىنشا جۇمىس جالعاسادى. سپورتتىق مەديتسينا ورتالىعىن كەزەڭ- كەزەڭىمەن جاڭعىرتۋ جانە ۇلتتىق قۇرامالاردى مەديتسينالىق- بيولوگيالىق قامتاماسىز ەتۋ ساپاسىن جاقسارتامىز. جاس سپورتشىلار جاعدايىندا ولاردىڭ جاس، فيزيولوگيالىق جانە پسيحولوگيالىق ەرەكشەلىكتەرى ەسكەرىلەدى. 2025-جىلى سپورت مەكەمەلەرى، كوماندالار قۇرامى، جاتتىقتىرۋشىلار، تورەشىلەر جانە سپورتتىق ءىس- شارالار تۋرالى مالىمەتتەر جيناۋعا ارنالعان e-sport ۇلتتىق سيفرلىق پلاتفورماسىن ەنگىزۋ جوسپارلانىپ وتىر» دەيدى اسحات ورالوۆ.
