اكەم ەلگە ءوزى كەلدى - سەرىك كۇدەبايەۆتىڭ ۇلى وقيعاعا قاتىستى اقپارات بەردى

تالدىقورعان. قازاقپارات - سەرىك كۇدەبايەۆتىڭ ۇلى ارمان مىرزاقۇلوۆ اكەسىنىڭ ەلگە ءوز ەركىمەن كەلگەنىن مالىمدەدى، دەپ حابارلايدى قازاقپارات ءتىلشىسى.

«اكەم ەلگە ءوز ەركىمەن كەلدى. مەنەن كەيىنگى ىنىمە قوڭىراۋ شالىپ، ەلگە ءوز ەركىمەن كەلە جاتقانىن ايتقان. اكەمدى كورمەگەنىمە دە 2 ايدان اسا ۋاقىت بولدى. تاعىلعان ايىپپەن كەلىسپەيمىن. سەبەبى، حالقىنا وق اتقان جوق»، - دەدى سەرىك كۇدەبايەۆتىڭ ۇلى ارمان مىرزاقۇلوۆ.

ءدال قازىر تالدىقورعاندا سەرىك كۇدەبايەۆقا قاتىستى سوت وتىرىسى بولادى دەپ كۇتىلۋدە. ءبىراق، جۋرناليستەردىڭ پروتسەستى كۇتىپ وتىرعانىنا 2 ساعاتتان اسا ۋاقىت ءوتتى، ءالى باستالمادى.

ەسكە سالايىق، تالدىقورعانداعى جەتىسۋ وبلىستىق سوتىندا سەرىك كۇدەبايەۆقا قاتىستى سوت 2023 -جىلدىڭ 5-قاڭتاردا باستالدى.

بۇعان دەيىن سەرىك كۇدەبايەۆتىڭ اۋرۋحاناعا تۇسكەنى تۋرالى جازعان ەدىك.

ايتا كەتەيىك، پروكۋرور سۋديادان سەرىك كۇدەبايەۆقا 9 جىل باس بوستاندىعىنان ايىرۋ جازاسىن تاعايىنداۋدى سۇراعان بولاتىن.

الماتى وبلىسى پوليتسيا دەپارتامەنتىنىڭ بۇرىنعى باستىعى سەرىك كۇدەبايەۆتىڭ سوتى قاڭتار ايىندا باستالعان.

ول 2020 -جىلدان باستاپ 2022 -جىلدىڭ قاڭتارىنا دەيىن الماتى وبلىسى پوليتسيا دەپارتامەنتىنىڭ باستىعى قىزمەتىن اتقارعان.

2022 -جىلدىڭ 18- اقپانىندا ول ىشكى ىستەر ورگاندارىنان ءوز ەركىمەن بوساتىلدى.

سوتتالۋشىنىڭ پروتسەسكە كەلمەگەنىنە بايلانىستى سەرىك كۇدەبايەۆتى سوتقا ءماجبۇرلى تۇردە جەتكىزۋ جونىندە قاۋلى شىقتى.

ارتىنشا گەنەرالدىڭ ەلدەن قاشىپ كەتكەنى بەلگىلى بولىپ، وعان حالىقارالىق ىزدەۋ جاريالاپ جاريالاندى. ال 27 -ءساۋىر كۇنى كۇدەبايەۆتىڭ ۇستالعانى جونىندەگى اقپاراتتى باس پروكۋراتۋرا راستادى.