ەربوسىن نۇرمۇقان ۇلىنىڭ جاڭا كىتابى جارىق كوردى

استانا. قازاقپارات - ەلورداداعى ق ر ۇلتتىق اكادەميالىق كىتاپحاناسىندا ەكونوميست، ساراپشى، «استانا اقشامى» گازەتىنىڭ تۇراقتى اۆتورلارىنىڭ ءبىرى ەربوسىن نۇرمۇقان ۇلىنىڭ «شاعىن بيزنەس شاڭ قاۋىپ قالماسىن» كىتابىنىڭ تۇساۋى كەسىلدى.

«وتانداستار قورى» كوممەرتسيالىق ەمەس اكسيونەرلىك قوعامى باس بولىپ ۇيىمداستىرعان بۇل مادەني شارانى ق ر پرەزيدەنتىنىڭ كەڭەسشىسى ماقسات سقاقوۆ جۇرگىزدى. قارا سوزگە كەلگەندە سۋ جورعاداي كوسىلەتىن ول ەربوسىن نۇرمۇقان ۇلىنىڭ ادامگەرشىلىك، كىسىلىك بولمىسى مەن ەكونوميكا سالاسىنداعى ەلەۋلى ەڭبەكتەرىنە توقتالا كەلىپ، تۇساۋى كەسىلىپ وتىرعان كىتاپتىڭ ەلىمىزدىڭ ەكونوميكاسىن دامىتىپ، شاعىن بيزنەسكە سەرپىن بەرۋگە سەپتىگى تيەتىن قۇندى ماتەريال ەكەنىن ايرىقشا اتاپ وتسە، «وتانداستار قورى» كوممەرتسيالىق ەمەس اكسيونەرلىك قوعامىنىڭ پرەزيدەنتى ابزال ساپاربەك ۇلى جاڭا كىتاپتى وقىرمانعا پايداسى تيەتىن كىتاپ دەپ اتادى.

- قازاقتا «ەلگە ەل قوسىلسا قۇت» دەگەن اتالى ءسوز بار.

ەربوسىن نۇرمۇقان ۇلى شەتەلدەن اتاجۇرتقا ورالىپ، ءبىلىمى مەن تاجريبەسىن ەل ەكونوميكاسىن وركەندەتۋگە جۇمساپ، كاسىبىن دوڭگەلەتىپ جۇرگەن ازاماتتاردىڭ ءبىرى. كاسىپكەرلىكپەن قاتار قوعامدىق ومىرگە دە بەلسەنە ارالاسىپ، كورگەندەرى مەن كوكەيگە تۇيگەندەرىن ەل دامۋىنا سەپتىگى تيەر ۇسىنىس، پىكىرلەرىن مەرزىمدى باسىلىم بەتتەرىندە ۇزبەي جاريالاپ كەلەدى.

مىنە سول ماقالالاردىڭ دەنى بۇگىن ءبىز تۇساۋىن كەسىپ وتىرعان جيناقتان كورىنىس تاۋىپتى. وتانعا ۇلەس قوسۋ دەگەن وسى ەمەس پە؟! ايتارى بار ازاماتتىڭ بۇل كىتابىنان ويلى وقىرماننىڭ ماڭىزدى دا پايدالى اقپاراتتار الاتىننان كۇمانىمىز جوق، - دەدى ابزال ساپاربەك ۇلى.

اۆتوردىڭ 50 جاسقا تولعان مەرەيتوي قۋانىشىنا وراي جارىق كورگەن كىتاپقا ەربوسىن نۇرمۇقان ۇلىنىڭ «استانا اقشامى»، «ەگەمەن قازاقستان» سياقتى ەلىمىزگە تانىمال گازەتتەر مەن اباي پورتالى سياقتى سايتتاردا جاريالانعان ماقالالارى ەنگىزىلگەن. اتى ايتىپ تۇرعانداي، كىتاپتىڭ نەگىزگى مازمۇنى شاعىن بيزنەستى دامىتۋ، مەملەكەتتىك ساتىپ الۋعا قاتىستى مەحانيزىمدى رەتتەۋ جاعىنداعى ۇتىمدى ۇسىنىستار مەن شەتەلدىڭ وزىق تاجىريبەلەرى تانىستىرىلعان.

قالياكبار ۇسەمحان ۇلى