سىبايلاس جەمقورلاردان الىنعان قاراجات قايدا جۇمسالاتىنى بەلگىلى بولدى

استانا. قازاقپارات – ق ر ۇكىمەتى سىبايلاس جەمقورلاردان سوت ارقىلى الىنىپ، مەملەكەتكە وتكەن اقشالاي قاراجاتتى مەكتەپتەردىڭ قۇرىلىسىنا بەرۋ مەحانيزمىن بەكىتتى، دەپ حابارلايدى قازاقپارات.

ءتيىستى تۇزەتۋلەر ەنگىزىلگەن قاۋلىعا ق ر پرەمەر-ءمينيسترى ءاليحان سمايىلوۆ قول قويدى.

مەملەكەت باسشىسى قاسىم-جومارت توقايەۆ 2022 -جىلعى 1-قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى حالىققا جولداۋىندا جەمقورلاردان الىنعان قاراجاتتى ءبىلىم بەرۋ ينفراقۇرىلىمىن قولداۋعا باعىتتاۋدى تاپسىرعان بولاتىن.

«جالپى، مەكتەپ سالۋ ۇكىمەت پەن اكىمدىكتەر ءۇشىن باستى مىندەتتەردىڭ ءبىرى بولۋى كەرەك. جەمقورلار سوتتالعاندا، ولاردىڭ زاڭسىز تاپقان قارجىسى مەملەكەتكە ءوتىپ، تۇگەلدەي مەكتەپ قۇرىلىسىنا جۇمسالۋعا ءتيىس»، - دەدى ق ر پرەزيدەنتى.

بۇگىنگى تاڭدا ءبىلىم بەرۋ ينفراقۇرىلىمىن قولداۋ قورىنا 121,7 ميلليارد تەڭگە ءتۇستى.

سونىمەن قاتار ەل باسشىلىعىنىڭ تاپسىرماسى بويىنشا رەسپۋبليكالىق بيۋدجەت كوميسسياسى 106,7 ميلليارد تەڭگەنى قۇرايتىن 72 جوبانى قولدادى.

اتاپ ايتقاندا، 94,1 ميلليارد تەڭگە 85 مىڭ ورىندىق 69 مەكتەپتىڭ قۇرىلىسىن اياقتاۋعا؛ تاعى 12,6 ميلليارد تەڭگە 3 جاڭا نىساننىڭ (ەكى اۋىسىمدا 1400 ورىنعا ارنالعان 2 مەكتەپ جانە 200 ورىندىق مەكتەپ-ينتەرنات) قۇرىلىسىن اياقتاۋعا باعىتتالادى.