بەلگىلى اقىن سەرىك قاليەۆ دۇنيەدەن ءوتتى

استانا. قازاقپارات - تانىمال اقىن، جۋرناليست سەرىك قاليەۆ ومىردەن ءوتتى.

بۇل تۋرالى بۇگىن ءوزىنىڭ Facebook پاراقشاسىندا ءدىنتانۋشى، جۋرناليست ارداق بايعابىل جازدى، دەپ حابارلايدى قازاقپارات.

«جاتقان جەرى جايلى بولسىن اعامىزدىڭ. بۇگىن قازاق ەلىنىڭ اقىنى، كەرەمەت تۇلعا، اسىل اعام سەرىك قاليەۆ باقيلىق بولدى. اللاھ راحىمىنا السىن ءسىزدى اعاۋ. 30 كۇن ورازاسىن ۇستاپ، ءشاۋۋال ايىنىڭ 6 كۇندىك ورازاسىن تۇگەندەپ، قۇپتان نامازىنا بارا جاتقان جەرىندە جولدا كولىك قاعىپ كەتتى اعامىزدى»، - دەپ جازدى ول.

سەرىك قاليەۆ - جامبىل وبلىسى، جامبىل اۋدانى، امانگەلدى اۋىلىندا تۋعان. ايتىسكەر اقىن.

1983-1995 -جىلدارى وبلىستىق، رەسپۋبليكالىق اقىندار ايتىستارىنا قاتىسىپ، جۇلدەلى ورىنداردى يەلەنگەن.

ولەڭدەرى 1987 -جىلى جاس اقىنداردىڭ «قارلىعاش» ۇجىمدىق جيناعىنا («جالىن») ەنگەن.