قازاقستان ەۋروپانىڭ ەكى ەلىمەن ازاماتتىق ىستەر بويىنشا ءوزارا قۇقىقتىق كومەك شارتىن بەكىتپەك
بۇل تۋرالى ادىلەت ۆيتسە-ءمينيسترى بوتاگوز جاكسەلەكوۆا ءمالىم ەتتى، دەپ حابارلايدى قازاقپارات ءتىلشىسى.
«قازاقستان تاۋەلسىزدىك العالى بەرى قۇقىقتىق كومەك كورسەتۋ سالاسىنداعى ءوزارا ءىس-قيمىلدى رەتتەۋ ماقساتىندا بارلىق ەلدەرمەن قارىم-قاتىناس ورناتىپ كەلەدى. ازاماتتىق جانە قۇقىقتىق سوت ءىسىن جۇرگىزۋ سالاسىندا قۇقىقتىق قاتىناستار ورناتۋدا كەلىسىمگە كەلەتىن ەلدەردىڭ سانى ارتا ءتۇستى. كەلىسىم نەگىزىنەن ت م د جانە ازيا ەلدەرىمەن جاسالعان. ءبىراق، ەۋروپا ەلدەرىمەن مۇنداي شارتتار ءىس جۇزىندە جوق. مىسالى، قىلمىستىق ىستەر بويىنشا فرانسيا، يتاليا، بولگاريا، موناكو، سولتۇستىك ماكەدونيا جانە تاعى باسقا ەلدەرمەن كەلىسىم راتيفيكاتسيالانعان. ال، ازاماتتىق ىستەر بويىنشا نەگە ولارمەن كەلىسىم جاسالماعان؟ بۇل باعىتتا قانداي جۇمىس اتقارىلىپ جاتىر؟» - دەپ سۇرادى سەنات وتىرىسىندا دەپۋتات جاننا اسانوۆا.
ساۋالعا ادىلەت ۆيتسە-ءمينيسترى بوتاگوز جاكسەلەكوۆا جاۋاپ بەردى.
«ءيا، بۇگىندە ەۋروپا ەلدەرىمەن ازاماتتىق ىستەر بويىنشا ءوزارا قۇقىقتىق كومەك كورسەتۋ شارتتارى جاسالماعان. ويتكەنى، ەۋروپا ەلدەرى شارت جاساسۋعا نيەت تانىتپاي وتىر. دەگەنمەن، ءبىز بۇل باعىتتاعى جۇمىستى جالعاستىرىپ جاتىرمىز. ايتار بولساق، قازىرگى كۇنى يتاليا جانە حورۆاتيامەن ءتيىستى شارالار جۇرگىزىلىپ جاتىر. سونىمەن قاتار، ءبىزدىڭ ەل گااگا كونۆەنتسياسىنا سايكەس، جەكە قۇقىق بويىنشا قاتىسۋشى. ونىڭ قۇرامىنا 82 مەملەكەت جانە ەۋرووداق ەلدەرى كىرەدى. وسى ورايدا، ازاماتتىق جانە قىلمىستىق ىستەر بويىنشا كومەك گااگا كونۆەنتسياسىنىڭ اياسىندا جۇزەگە اسىرىلادى»، - دەيدى ادىلەت ءمينيسترىنىڭ ورىنباسارى.
ايتا كەتسەك، بۇگىن سەناتتا قازاقستان مەن قىرعىز رەسپۋبليكاسىنىڭ ءوزارا قۇقىقتىق كومەك كورسەتۋ شارت راتيفيكاتسيالاندى.
