قازاقستان مەن قىرعىز رەسپۋبليكاسىنىڭ ءوزارا قۇقىقتىق كومەك كورسەتۋ شارتىنا وزگەرتۋلەر ەنگىزىلدى

استانا. قازاقپارات - پارلامەنت سەناتى قازاقستان مەن قىرعىز رەسپۋبليكاسى اراسىنداعى ازاماتتىق جانە قىلمىستىق ىستەر جونىندەگى ءوزارا قۇقىقتىق كومەك كورسەتۋ تۋرالى شارتقا وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالادى، دەپ حابارلايدى قازاقپارات ءتىلشىسى.

«نازارلارىڭىزعا «1996 -جىلعى 26-تامىزداعى قازاقستان رەسپۋبليكاسى مەن قىرعىز رەسپۋبليكاسى اراسىنداعى ازاماتتىق جانە قىلمىستىق ىستەر جونىندەگى ءوزارا قۇقىقتىق كومەك كورسەتۋ تۋرالى شارتقا وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭى ۇسىنىلىپ وتىر. اتالعان شارت 1997 -جىلعى 30-ماۋسىمداعى قازاقستان رەسپۋبليكاسىنىڭ زاڭىمەن راتيفيكاتسيالانعان. زاڭ تاراپتار اراسىندا كورسەتىلەتىن ازاماتتىق جانە قىلمىستىق ىستەر جونىندەگى ءوزارا قۇقىقتىق كومەكتىڭ ءتارتىبى مەن تالاپتارىن ناقتىلاۋعا جانە ەكى ەل ازاماتتارىنىڭ قۇقىقتارىن قورعاۋعا باعىتتالعان»، - دەدى سەناتور نۇرلان بەكنازاروۆ.

سونداي- اق، سەنات دەپۋتاتى شارتقا ەنگىزىلگەن وزگەرىستەر مەن تولىقتىرۋلاردى اتاپ بەردى.

«شارتتىڭ ءتيىستى بابىنا ءوزارا قۇقىقتىق كومەك كورسەتۋ كەزىندەگى قاتىناستاردى جۇزەگە اسىراتىن قۇزىرەتتى ورگانداردى ايقىنداۋدى جانە ول جايىندا ديپلوماتيالىق ارنالار ارقىلى ءبىر- ءبىرىن حاباردار ەتۋدى كوزدەيتىن وزگەرىس ەنگىزۋ. ەكى مەملەكەتتىڭ قولدانىستاعى زاڭدارىنداعى وزگەرىستەرگە بايلانىستى «سوت شەشىمدەرى» تەرمينىنە قوسىمشا «سوت بۇيرىعى» تۇسىنىگىن ەنگىزۋ ارقىلى، سوت شەشىمدەرىن ورىنداۋ جانە بەرەشەكتەردى ءوندىرىپ الۋ ماسەلەلەرىنە قاتىستى راسىمدەردى رەتتەۋ. سونداي- اق، قىلمىستىق ىستەر بويىنشا قۇقىقتىق كومەك كورسەتۋ ماسەلەلەرىنە قاتىستى قۇزىرەت قازاقستان رەسپۋبليكاسىنىڭ باس پروكۋراتۋراسىنا بەرىلۋىنە بايلانىستى شارتتىڭ 28-بابىنىڭ كۇشىن جويۋ ۇسىنىلىپ وتىر. سونىمەن بىرگە، ىشكى ىستەر ورگاندارى قۇزىرەتىنىڭ الىپ تاستالۋىنا بايلانىستى شارتتىڭ ءتيىستى بابىنا تۇزەتۋلەر ەنگىزىلگەن. ۇسىنىلىپ وتىرعان وزگەرىستەر مەن تولىقتىرۋلار شارتتىڭ ارەكەت ەتۋى مەن قۇقىقتىق قاتىناستاردى رەتتەۋ مۇمكىندىكتەرىن كەڭەيتەدى»، - دەيدى ول.

ونىڭ ايتۋىنشا، رەسمي مالىمەتتەرگە سايكەس، 2022 -جىلى قىرعىزستان تاراپىنان قۇقىقتىق كومەك كورسەتۋ جونىندە 373 سۇرانىس، ءبىزدىڭ ەلىمىزدەن قىرعىزستان رەسپۋبليكاسىنىڭ قۇزىرلى ورگاندارىنا 304 سۇرانىس جولدانعان. ەكىجاقتى سۇرانىستاردىڭ باسىم بولىگى قاناعاتتاندىرىلعان.

«سوندىقتان دا، اتالعان شارت ازاماتتارعا شەتەلدە كەيبىر جاعدايلار تۋىنداعان كەزدە قاجەتتى قۇجاتتارىن راسىمدەۋ مەن قول جەتكىزۋ تۇرعىسىنان وتە ماڭىزدى. «قازاقستان رەسپۋبليكاسىنىڭ حالىقارالىق شارتتارى تۋرالى» زاڭىنا سايكەس حاتتاما راتيفيكاتسيالاۋعا جاتادى. حاتتامانى راتيفيكاتسيالاۋ قازاقستان مەن قىرعىزستان ازاماتتارىنا قۇقىقتىق كومەك كورسەتۋ سالاسىنداعى ەكىجاقتى ىنتىماقتاستىقتى ودان ءارى نىعايتۋعا ىقپال ەتەدى. سەنات كوميتەتتەرىنەن زاڭ بويىنشا ەسكەرتۋلەر مەن ۇسىنىستار كەلىپ تۇسكەن جوق»، - دەدى ن. بەكنازاروۆ.

تالقىلاۋ ناتيجەسىندە سەنات دەپۋتاتتارى ءبىر اۋىزدان قازاقستان مەن قىرعىز رەسپۋبليكاسى اراسىنداعى ازاماتتىق جانە قىلمىستىق ىستەر جونىندەگى ءوزارا قۇقىقتىق كومەك كورسەتۋ تۋرالى شارتقا وزگەرىستەر مەن تولىقتىرۋلار ەنگىزۋ تۋرالى حاتتامانى قولداپ، راتيفيكاتسيالادى.