12:22, 27 - ءساۋىر 2023 | GMT +5
تۇركيا پرەزيدەنت اكىمشىلىگى ەردوعاننىڭ اۋىرىپ قالعانى تۋرالى اقپاراتقا تۇسىنىك بەردى
انكارا. قازاقپارات - پرەزيدەنت اكىمشىلىگىنىڭ كوممۋنيكاتسيا دەپارتامەنتىنە قاراستى جالعان اقپاراتپەن كۇرەس ورتالىعى ەل باسشىسىنىڭ اۋرۋحانادا جاتقانى جايلى اقپاراتتى تەرىسكە شىعاردى، دەپ حابارلايدى قازاقپارات.
بۇل جايىندا اتالمىش ورتالىقتىڭ كەشە Twitter- دە جاريالاعان جازباسىندا ايتىلعان.
«پرەزيدەنت رەجەپ تايىپ ەردوعاننىڭ جۇرەك ۇستاماسى ۇستاپ، اۋرۋحاناعا جاتقىزىلعانى تۋرالى اقپارات شىندىققا جاناسپايدى. قۇرمەتتى ەل باسشىسى 27-ساۋىردە «اككۋيۋ» اتوم ەلەكتر ستانساسىنان العاشقى وتىن جونەلتۋ سالتاناتتى شاراسىنا انكاراداعى كەڭسەسىنەن تىكەلەي بايلانىس ارقىلى قاتىسادى» دەلىنگەن حابارلامادا.
كەيىننەن ەلدىڭ ۆيتسە- پرەزيدەنتى فۋات وكتاي مالىمدەمە جاساپ، پرەزيدەنتتىڭ دەنساۋلىعى وتە جاقسى ەكەنىن ايتتى.
«ۇنەمى بايلانىستامىز، ازداپ سۋىق ءتيىپ قالدى» دەدى ول.
ەسكە سالا كەتەيىك، كەشە رەجەپ تايىپ ەردوعان تەلەارناعا سۇحبات بەرىپ وتىرىپ، ءوزىن جايسىز سەزىنگەن سوڭ تىكەلەي ەفير ورتاسىنان ۇزىلگەنى حابارلانعان ەدى.
