ەلىمىزدىڭ استىعى رەسەي بيدايىمەن باسەكەگە تۇسە الماي وتىر
القالى جيىنعا كاسىپكەرلەر، مەملەكەتتىك مەكەمە وكىلدەرى، ورتالىق ازيا ەلدەرىنىڭ اۋىل شارۋاشىلىعى سالاسىنىڭ ساراپشىلارى قاتىستى. وتكەن جىلى ەلىمىز استىقتان مول ءونىم الدى. بۇگىنگى تاڭدا ءبىر عانا بيداي ەكسپورتىنىڭ كولەمى 6 ميلليون توننا. شارۋالار بولسا، بۇل كورسەتكىشتىڭ اگرارلىق ەل ءۇشىن از ەكەنىن ايتادى. ويتكەنى وتاندىق ديقاندار جىلىنا 8 ميلليون توننا بيدايدى شەتەلگە ساتۋعا قاۋقارلى ەكەن. الايدا قازىرگى گەوساياسي جاعدايعا بايلانىستى مۇنداي كورسەتكىشكە جەتۋ قيىن، دەيدى.
الىبەك التاي، ۇلتتىق ەكسپورتتاۋشىلار قاۋىمداستىعى باسقارما ءتوراعاسىنىڭ ورىنباسارى:
- نارىقتاعى اۋىل شارۋاشىلىعى ونىمدەرى باعاسىنىڭ تومەن بولۋى بىزگە قاتتى اسەر ەتىپ وتىر. ويتكەنى سولتۇستىكتەگى كورشىلەرىمىز وتكەن جىلى مول ءونىم جينادى. وعان قوسا گەوساياسي جاعدايعا بايلانىستى ءداستۇرلى ەكسپورت جولى جابىلىپ، ورتالىق ازيا نارىعىنا ىقپال ەتۋدە. وسىعان بايلانىستى شارۋالاردىڭ ونىمدەرى ارزانداپ كەتتى. بۇگىندە رەسەي استىعىنىڭ باعاسى ءبىزدىڭ ونىمنەن 30 پايىزعا ارزان. وعان ترانزيتتىڭ تاريف قۇنىن قوسا ەسەپتەگەندە دە وتاندىق ءونىم باسەكەلەستىككە قابىلەتسىزدىك تانىتىپ وتىر.
وتكەن اپتادا ۇكىمەت رەسەيدەن اۆتوكولىكپەن استىق كىرگىزۋگە ۋاقىتشا تىيىم سالدى. الايدا ەۋرازيالىق ەكونوميكالىق وداققا مۇشە بولعاندىقتان يمپورتتى تولىق جاۋىپ تاستاۋعا قاۋقارسىز. وتاندىق استىقتىڭ ساپاسى مىقتى. وسىنى العا تارتىپ، قىتاي نارىعىنا شىعۋعا مۇمكىندىك بار، - دەيدى ماماندار.
الىبەك التاي، ۇلتتىق ەكسپورتتاۋشىلار قاۋىمداستىعى باسقارما ءتوراعاسىنىڭ ورىنباسارى:
- ءۇش جىلدىق كارانتيندىك شەكتەۋدەن كەيىن قىتاي نارىعى اشىلدى. ساۋىردەن بەرى سىناق رەتىندەگى ەكسپورتتى باستادىق. ەكى ەل ۇكىمەتى اراسىنداعى كەلىسىم ارقاسىندا وسى ايدا 100 مىڭ توننا بيدايدى جونەلتتىك. قىتاي نارىعىنا تولىق كىرسەك، ءبىز ءۇشىن ۇلكەن كومەك بولادى.
بۇدان بولەك وتاندىق شارۋالاردى استىق نارىعىنىڭ الداعى 5-10 جىلدىق بولاشاعى الاڭداتۋدا. ويتكەنى، باسەكە كۇن ساناپ ارتىپ جاتقاندىقتان شيكىزات ەكسپورتىنىڭ بولاشاعى بۇلىڭعىر. ال ەلىمىز شيكىزاتتى وڭدەۋگە ءالى دايىن ەمەس. وعان قوسا، مەملەكەتتىك قولداۋ بارلىعىنا بىردەي جەتپەيدى. بانكتىك نەسيەنىڭ پايىزىن دا، اۋىلشارۋاشىلىق تەحنيكالارىنىڭ باعاسىن دا شارۋالاردىڭ قالتاسى كوتەرمەي بارادى.
ەربول ەسەنەيەۆ، «اتامەكەن» ۇ ك پ باسقارما باسشىسىنىڭ ورىنباسارى:
- وكىنىشكە وراي، وتكەن جىلى يمپورتتىڭ كولەمى 5 ميلليارد دوللاردان استى. ەكسپورتتىڭ كولەمى دە ءارى- بەرى 5 ميلليارد كولەمىندە. سوندىقتان بىزگە قازىرگى ماقساتىمىز وسى يمپورتتى ازايتۋ، ەكسپورتتىڭ كولەمىن ۇلعايتۋ. ەندى شيكىزاتتاي شىعارماي، ەكسپورتقا شىعارعاننىڭ وزىندە دايىن ءونىم جاڭاعى قوسىمشا باعاسى قوسىلعان قىمبات باعامەن، قىمبات زاتتارمەن شىعارۋ. قازىر استىق سالاسىن ارزان باعا بيلەپ تۇر. الداعى جاعدايدىڭ قالاي وزگەرەتىنى ازىرگە بەلگىسىز. مۇنداي جاعدايدا ۇكىمەتتىڭ اۋىلشارۋاشىلىعىنا قولداۋى اۋاداي قاجەت، دەيدى ساراپشىلار.
www.24.kz
