قاراعاندىدا شەنەۋنىك مەملەكەتتىك قىزمەتپەن قوسا جەكە بيزنەسپەن دە اينالىسقان
ناتيجەسىندە ەكى شەنەۋنىك اكىمشىلىك جاۋاپكەرشىلىككە تارتىلدى، دەپ حابارلايدى قازاقپارات ءتىلشىسى.
سىبايلاس جەمقورلىققا قارسى قىزمەت قاراعاندى وبلىسىنىڭ ونەركاسىپ جانە يندۋستريالىق-يننوۆاتسيالىق دامۋ باسقارماسى باسشىسىنىڭ ورىنباسارى تاراپىنان كاسىپكەرلىك قىزمەتكە كەدەرگى جاساۋ فاكتىسىن انىقتادى.
«كاسىپورىن كەڭ تارالعان پايدالى قازبالاردى وندىرۋگە ارنالعان ليتسەنزيانىڭ قولدانىلۋ مەرزىمىنىڭ اياقتالۋىنا بايلانىستى اتالعان ليتسەنزيانىڭ قولدانىلۋ مەرزىمىن ۇزارتۋ ءۇشىن باسقارماعا جۇگىنگەنى انىقتالدى. كاسىپورىن قارجىلىق جانە كەلىسىمشارت مىندەتتەمەلەرىن تيىسىنشە ورىنداعان. الايدا، قاراعاندى وبلىسىنىڭ ونەركاسىپ جانە يندۋستريالىق-يننوۆاتسيالىق دامۋ باسقارماسى باسشىسىنىڭ ورىنباسارى كاسىپورىننىڭ ءتيىستى قۇجاتتارىن ۇزارتۋدان سەبەپسىز باس تارتقان»، - دەپ حابارلادى سىبايلاس جەمقورلىققا قارسى قىزمەتتىڭ باسپا ءسوز قىزمەتى.
سوتتا باسقارما باسشىسىنىڭ ورىنباسارى ءوز ارەكەتىمەن كاسىپورىننىڭ كاسىپكەرلىك قىزمەتپەن اينالىسۋىنا ناقتى كەدەرگى كەلتىرگەنى انىقتالدى.
وسىعان بايلانىستى، ول كاسىپكەرلىك قىزمەتكە زاڭسىز ارالاسقانى ءۇشىن اكىمشىلىك قۇقىق بۇزۋ تۋرالى كودەكستىڭ 173-بابى بويىنشا اكىمشىلىك جاۋاپكەرشىلىككە تارتىلدى.
سونداي-اق، قاراعاندى وبلىسى بويىنشا سىبايلاس جەمقورلىققا قارسى قىزمەتتىڭ ماماندارى ر م ك فيليالىنىڭ باسشىسى كاسىپكەرلىك قىزمەتپەن اينالىسقانىن انىقتادى.
ول ءوز اتىنا ج ك تىركەپ، ج ش س قۇرىلتايشىسى بولا وتىرىپ، قىزمەت كورسەتۋگە مەملەكەتتىك ساتىپ الۋ تۋرالى شارت جاساسقان.
«ر م ك فيليالىنىڭ باسشىسى كاسىپكەرلىك قىزمەتپەن اينالىسقانى ءۇشىن اكىمشىلىك قۇقىق بۇزۋ تۋرالى كودەكستىڭ 154-بابى بويىنشا اكىمشىلىك جاۋاپكەرشىلىككە تارتىلدى. ايىپپۇل تولىق كولەمدە تولەندى»، - دەپ تولىقتىردى سىبايلاس جەمقورلىققا قارسى قىزمەت.
ق ر «سىبايلاس جەمقورلىققا قارسى ءىس-قيمىل تۋرالى» زاڭىنا سايكەس مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن ادامدارعا تەڭەستىرىلگەن ادامدارعا پەداگوگيكالىق، عىلىمي جانە وزگە دە شىعارماشىلىق قىزمەتتەن باسقا اقىلى قىزمەتپەن اينالىسۋعا تىيىم سالىنادى.
