انام ءجيى ەت اسىپ، باۋىرساق پىسىرەدى - كوپ ۇلتتى وتباسىنىڭ مۇشەسى رايسا زۋيەۆا
ونىڭ اجەسى - پولياك، اكەسى - ورىس، ال اناسى - قازاق، دەپ حابارلايدى قازاقپارات ءتىلشىسى.
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆل تۇرعىنى رايسا زۋيەۆا وسىدان 3 جىل بۇرىن قۇقىق قورعاۋ ورگاندارىنا قىزمەتكە كەلدى. بويجەتكەن باستاپقىدا ءومىرىن پوليتسيامەن بايلانىستىرۋعا شەشىم قابىلداعاندا، اتا-اناسى قارسىلىق بىلدىرگەن. ءبىراق اكەسى كەيىن رۇقساتىن بەرگەن.
«تاڭداۋىما وكىنگەن كەزىم بولعان جوق. قازىر قۇقىقتىق ءتارتىپتى قامتاماسىز ەتۋگە قاتىسامىن. پەتروپاۆل قالالىق پوليتسيا باسقارماسىنىڭ قابىلداپ- تاراتۋ ورنىندا ەڭبەك ەتەمىن. مۇندا كۇن سايىن ءۇيسىز- كۇيسىز جۇرگەن ادامدار جەتكىزىلەدى، ولاردىڭ ساۋساق ىزدەرىن الامىز. ىزدەۋدە بار ما- جوق پا - تەكسەرەمىز. تۇرعىلىقتى مەكەنجايى جوق ادامدارمەن جۇمىس ىستەۋ مۇقيات بولۋدى، شىدامدىلىق پەن ۇقىپتىلىقتى تالاپ ەتەدى. كەز كەلگەن ادام، الەۋمەتتىك مارتەبەسىنە قاراماستان، ەڭ الدىمەن ادام ەكەنىن ۇمىتپاۋىمىز كەرەك»، - دەيدى رايسا زۋيەۆا.
بويجەتكەن قازاق ءتىلىن جەتىك مەڭگەرگەن.
«مەنىڭ اجەم - پولياك، اكەم - ورىس، ال انام - قازاق. ءبىزدىڭ ۇيدە قازاقتىڭ ۇلتتىق داستۇرلەرى باسىم، وتباسىمىزبەن جاقىندا ايت مەيرامىن اتاپ وتتىك. انام ءجيى ەت اسىپ، باۋىرساق پىسىرەدى. مەن دە، ءسىڭلىم ۆەنەرا مەن ءىنىم ءامىر دە - ءبىز ءوزىمىزدى بىردەن ەكى ۇلتقا جاتقىزامىز»، - دەيدى رايسا.
ءتارتىپ ساقشىسىنىڭ ايتۋىنشا، قازاقستان حالقىنىڭ بىرلىگى كۇنى ول ءۇشىن ەرەكشە مەرەكە. بۇل جولى دا كوپ ۇلتتى وتباسى مەيرامدى كەڭ داستارحان باسىندا اتاپ وتپەك.
س ق و پوليتسيا دەپارتامەنتىندە قازىرگى ۋاقىتتا 21 ۇلتتىڭ وكىلى ەڭبەك ەتىپ جاتىر.
