قىتاي داعدارىستى جاعدايدى تۇراقتاندىرۋ ءۇشىن ۋكرايناعا وكىلىن جىبەرەدى
بۇل تۋرالى سارسەنبى كۇنى ق ح ر باسشىسى شي جينپيڭ ۋكراينا پرەزيدەنتى ۆلاديمير زەلەنسكيمەن تەلەفون ارقىلى سويلەسۋ كەزىندە مالىمدەدى، دەپ حابارلايدى قازاقپاراتتىڭ مەنشىكتى ءتىلشىسى.
«قىتاي ۋكراينا داعدارىسىن ساياسي تۇرعىدان رەتتەۋ ماسەلەلەرى بويىنشا بارلىق تاراپپەن پىكىر الماسۋ ءۇشىن ۋكراينا مەن باسقا دا ەلدەرگە ق ح ر ۇكىمەتىنىڭ ەۋرازيا ىستەرى جونىندەگى ارنايى وكىلىن جىبەرەدى»، - دەپ كەلتىرىلگەن شي جينپيڭنىڭ ءسوزى سارسەنبى كۇنى ق ح ر س ءى م تاراتقان باسپا ءسوز حابارلاماسىندا.
شي جينپيڭ ۋكراينا داعدارىسىنىڭ كۇردەلى ەۆوليۋتسياسى حالىقارالىق جاعدايعا اسەر ەتىپ جاتقانىن اتاپ ءوتتى. قىتاي ءاۋ باستان بەيبىتشىلىكتى قالايدى. ۋكراينا داعدارىسىنا قاتىستى قىتاي ۇستانىمى - تاتۋلاسۋ مەن كەلىسسوز جۇرگىزۋگە ىقپال ەتۋ.
«داعدارىستان شىعاتىن جالعىز جول - ديالوگ پەن كەلىسسوز. يادرولىق سوعىستا جەڭىمپاز بولمايدى. تاراپتار سالقىنقاندى بولىپ، يادرولىق قارۋ ماسەلەسىندە ۇستامدىق تانىتۋى كەرەك، ءوز بولاشاعى مەن ادامزاتتىڭ تاعدىرى ءۇشىن داعدارىستى بىرگە باسقارۋى قاجەت»، - دەپ مالىمدەدى قىتاي باسشىسى.
«قىتاي الداعى ۋاقىتتا دا بەيبىت كەلىسسوزدەرگە جاعداي جاساپ، وق اتۋدى تەزىرەك توقتاتىپ، بەيبىتشىلىك ورناتۋعا كۇش سالادى»، - دەدى ول.
