ءتۇرلى ۇلت وكىلدەرى استانادا كيىز ءۇي تىگىپ، ۋىق شانشىدى
كيىز ءۇي Nazarbayev University الاڭىندا ورناتىلدى. بۇل شارا قازاقستان حالقى اسسامبلەياسىنىڭ «ادىلەتتى قازاقستان: بىرلىك، تۇراقتىلىق، دامۋ» كۇن ءتارتىبى بويىنشا XXXII سەسسياسى اياسىندا ۇيىمداستىرىلدى.
وسىلايشا، قازاقستان حالقىنىڭ بىرلىگىن، ۇيلەسىمدى ەتنوسارالىق قاتىناستاردى، قازاقتىڭ قاسيەتتى سيمۆولىنا قۇرمەت كورسەتۋ كوزدەلگەن.
سالتاناتتى شاراعا قر پارلامەنتىنىڭ دەپۋتاتتارى، ورتالىق جانە جەرگىلىكتى اتقارۋشى ورگانداردىڭ باسشىلارى، ق ح ا مۇشەلەرى، رەسپۋبليكالىق جانە وڭىرلىك ەتنومادەني بىرلەستىكتەردىڭ ءتوراعالارى، عىلىمي، شىعارماشىلىق زيالى قاۋىم مەن ب ا ق وكىلدەرى قاتىستى. ونداعى ءاربىر ۇلت وكىلى ءوز ۇلتتىق كيىمىن تانىستىردى. ەر ادامدار كيىز ءۇيدى ورناتۋمەن اينالىسسا، ايەلدەر قازاقتىڭ حالىق اندەرىن شىرقادى.
«بۇگىن - جىل سايىن ءداستۇرلى باس قوساتىن ق ح ا سەسسياسىنىڭ ءبىرىنشى كۇنى. كيىز ۇيگە كەلەتىن بولساق، بۇل سيمۆولدىق ءمانى زور ءىس- شارا بولدى، وندا ءارتۇرلى ەتنوس وكىلدەرى كيىز ءۇيدىڭ ۋىعىن قادايدى. بۇل ءبىزدىڭ ورتاق شاڭىراق قۇرىپ جاتقانىمىزدى بىلدىرەدى، وندا بەيبىتشىلىك پەن اماندىق ورنايدى جانە بەيبىتشىلىكتى، تۇراقتىلىقتى، حالىق دوستىعىن بەينەلەيدى»، - دەدى «استانا قالاسىنىڭ كورەيلەرى» ەتنومادەني بىرلەستىگى ءتوراعاسىنىڭ ورىنباسارى روزا پاك.
قازاقستانداعى «جايحۋن» قاراقالپاق ەتنومادەني ورتالىعىنىڭ ءتورايىمى زابيكە ساليەۆا قاراقالپاق حالقىنىڭ ۇلتتىق كيىمىمەن كەلدى.
«ءبىزدىڭ حالقىمىزدا قىز بالالار بالا كەزىنەن وزدەرىنىڭ كەلىنشەك كيىمىن تىگەدى، ساۋكەلەنى اسەم تاستارمەن كومكەرەدى. باسىمداعى ساۋكەلەنىڭ فورماسى - قاراقالپاق حالقىنداعى «قىرىق قىز» داستانىنان، سونداعى گۇلايىمنىڭ وبرازىنان الىنعان. ساۋكەلە دە كۇمىسپەن، التىنمەن، كورالل تاستارىمەن، كوز مونشاقپەن اشەكەيلەنگەن. كويلەكتەگى ويۋ «سىرعا» دەپ اتالادى، بۇل قىز بالالاردىڭ ارنايى ورنەگى، ودان بولەك، جۇكتى ايەلدەردىڭ، ەر ادامداردىڭ ورنەكتەرى ءارتۇرلى بولادى»، - دەدى ز. ساليەۆا.
ونىڭ ايتۋىنشا، قازاقستان ازاماتتىعىن العان 14-15 مىڭ قاراقالپاق بار، ودان بولەك ىقتيارحات ارقىلى قازاقستاندا تۇراتىن، جۇمىس ىستەيتىن 60 مىڭنان استام قاراقالپاق بار. «جايحۋن» قاراقالپاق ەتنومادەني ورتالىعى اياسىندا ءجيى باس قوسىپ تۇرادى.
