19:57, 26 - ءساۋىر 2023 | GMT +5
اسكەري بيلەتتى زاڭسىز بەرگەن قورعانىس ءبولىمىنىڭ قىزمەتكەرى قاماۋعا الىندى
ورال. قازاقپارات - باتىس قازاقستان وبلىسىندا اۋداندىق قورعانىس ىستەرى ءبولىمىنىڭ قىزمەتكەرى بىرنەشە رەت پارا الدى دەگەن كۇدىككە ءىلىندى، دەپ حابارلايدى قازاقپارات ءتىلشىسى.
ب ق و بويىنشا سىبايلاس جەمقورلىققا قارسى ءىس-قيمىل دەپارتامەنتىنەن ءمالىم ەتكەنىندەي، قازىرگى كەزدە سوتقا دەيىنگى تەرگەۋ امالدارى جالعاسىپ جاتىر.
«اتالعان لاۋازىمدى قىزمەتكەر اسكەردەن جالتارعاندارعا اسكەري بيلەتتەردى زاڭسىز بەرگەنى ءۇشىن بىرنەشە رەت پارا الدى دەلىنىپ وتىر. كۇدىكتى تەرگەۋ سوتىنىڭ سانكسياسىمەن قاماۋعا الىندى. ق ر قىلمىستىق ءىس جۇرگىزۋ كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى»، - دەپ حابارلادى ۆەدومستۆودان.
ەسكە سالا كەتەيىك، بۇدان بۇرىن ب ق و- دا پوليتسيا قىزمەتكەرى پارا الدى دەگەن كۇدىككە ىلىنگەنىن جازعان بولاتىنبىز.
سونداي-اق ب ق و- دا كولىكتىك باقىلاۋ ينسپەكسياسىنىڭ ءۇش قىزمەتكەرى پارا الدى دەگەن كۇدىككە ءىلىندى.
