بانكتەر الاياقتاردان كەلگەن شىعىندى قازاقستاندىقتارعا وتەۋگە مىندەتتەلمەك

استانا. قازاقپارات - نەسيە الۋدا الاياقتارعا الدانعان قازاقستاندىقتارعا شىعىندى وتەۋ ماسەلەسى پىسىقتالىپ جاتىر.

بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ايتتى، دەپ حابارلايدى قازاقپارات ءتىلشىسى.

«بۇل تۇرعىدا الاياقتىق جولمەن تۇرعىندارعا نەسيە راسىمدەلۋى مۇمكىن نەمەسە ادامداردىڭ جەكە قاراجاتى جىمقىرىلۋى ىقتيمال. ەگەر سوت شەشىمى بولماسا، وندا قارجى ينستيتۋتى جاعىنان مۇنداي وتەماقى جۇزەگە اسىرىلمايدى. ەكىنشىدەن، ەگەر اقپاراتتىق قاۋىپسىزدىك نەمەسە بانكتىڭ اقپاراتتىق جۇيەلەرى كەمشىلىگى سالدارىنان سالىمشىنىڭ اقشاسى جىمقىرىلسا، ياعني بۇل سالىمشىنىڭ كىناسى بولماسا، وندا ءبىز زاڭنامالىق دەڭگەيدە بانكتىڭ وتەماقى تولەۋى جونىندەگى مىندەتتەمەسىن قاراستىرعىمىز كەلەدى»، - دەدى م. ءابىلقاسىموۆا ماجىلىستە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، قازىرگى كەزدە بۇل پروتسەدۋرانىڭ مەحانيزمى مەن الگوريتمى ازىرلەنىپ جاتىر. وندا الاياقتىق وپەراتسيالاردىڭ بارلىق تيپولوگياسى، اقپاراتتىق قاۋىپسىزدىك پەن سمارتفوندارعا ارنالعان قوسىمشالارعا قاتىستى تالاپتار ەسكەرىلمەك.

«ەگەر بۇل تالاپتار بۇزىلسا، قارجى ۇيىمدارى ءۇشىن ءتيىستى جاۋاپكەرشىلىك قاراستىرىلادى» ، - دەپ قوستى ءمادينا ءابىلقاسىموۆا.

ءتيىستى زاڭ جوباسىن ماجىلىسكە 2023 -جىلدىڭ ماۋسىم ايىنىڭ سوڭىنا دەيىن ەنگىزىلمەك.

بۇدان بۇرىن حابارلانعانداي، قازاقستاندا جاڭا بانكتەردى اشۋ تالاپتارى جەڭىلدەتىلۋى مۇمكىن.

قر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى Bereke Bank- ءتى قاي ەلدىڭ ينۆەستورلارى ساتىپ الۋى مۇمكىن ەكەنىن ايتتى.