تاۋارلار كودىن ىزدەۋدىڭ ونلاين-سەرۆيسى ىسكە قوسىلدى
«كەدەندىك راسىمدەۋدى جۇرگىزۋ كەزىندە ماڭىزدى پروتسەستەردىڭ ءبىرى كەدەندىك تولەمدەردى ەسەپتەۋ، تاريفتىك جانە تاريفتىك ەمەس رەتتەۋ شارالارىن ايقىنداۋ، ليتسەنزيالار الۋ ءۇشىن پايدالانىلاتىن تاۋارلاردىڭ كودىن ناقتىلاۋ بولىپ تابىلادى. تاۋاردىڭ دۇرىس كودىن تاڭداۋ - كەدەندىك راسىمدەۋدىڭ جىلدام ءوتۋىنىڭ كەپىلى. تاۋار كودىن دۇرىس انىقتاماۋ كەدەندىك تولەمدەر مەن سالىقتاردى دۇرىس ەسەپتەمەۋگە اكەلۋى مۇمكىن، بۇل سىرتقى ەكونوميكالىق قىزمەتكە قاتىسۋشىنىڭ بەدەلىنە تەرىس اسەر ەتەدى جانە اكىمشىلىك جازاعا اكەلۋى مۇمكىن»، - دەپ جازدى ۆەدومستۆودان.
قازاقستان رەسپۋبليكاسى قارجى مينيسترلىگىنىڭ مەملەكەتتىك كىرىستەر كوميتەتى قىزمەتىن سىرتقى ەكونوميكالىق قىزمەتكە قاتىسۋشىلارعا بارىنشا ىڭعايلى ەتۋگە شارالار قابىلداۋدا.
وسى ماقساتتا بۇگىنگى كۇنى keden.kz سىلتەمەسى بويىنشا سىرتقى ەكونوميكالىق قىزمەتكە قاتىسۋشىلارعا سىرتقى ەكونوميكالىق قىزمەت تاۋارلار نومەنكلاتۋراسىنىڭ كودىن ىزدەۋدىڭ ونلاين-سەرۆيسى ۇسىنىلدى. بۇل سەرۆيس وزەكتى بولىپ تابىلادى جانە ونى ودان ءارى جاڭارتۋ ەۋرازيالىق ەكونوميكالىق كوميسسيانىڭ شەشىمدەرى نەگىزىندە جۇزەگە اسىرىلاتىن بولادى.
