مۇگەدەكتىگى بار قازاقستاندىقتار ب ۇ ۇ جانىنداعى كوميتەتكە شاعىمدانا الادى

استانا. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءماجىلىس قابىلداعان «مۇگەدەكتەردىڭ قۇقىقتارى تۋرالى كونۆەنتسياعا فاكۋلتاتيۆتىك حاتتامانى راتيفيكاتسيالاۋ تۋرالى» زاڭنىڭ ءمانىن ءتۇسىندىردى، دەپ حابارلايدى قازاقپارات ءتىلشىسى.

«ءبىز 2008-جىلى مۇگەدەكتىگى بار جانداردىڭ قۇقىقتارى تۋرالى كونۆەنتسياعا جانە وسى كونۆەنتسياعا فاكۋلتاتيۆتىك حاتتاماعا قول قويدىق. ال 2015-جىلى وسى كونۆەنتسيانى راتيفيكاتسيالادىق. ياعني، قازاقستان مۇگەدەكتىگى بار ادامداردى الەۋمەتتىك قورعاۋ بولىگىندە حالىقارالىق ستاندارتتاردى قامتاماسىز ەتۋ مىندەتتەمەلەرىن موينىنا الدى. وسى ارالىقتا ءبىز زاڭناماعا ءتيىستى وزگەرىستەر ەنگىزدىك، مۇگەدەك جانداردىڭ ءومىر ءسۇرۋ ساپاسىن ارتتىرۋ جونىندەگى ۇلتتىق جوسپاردى قابىلدادىق، ونىڭ ەكىنشى كەزەڭىن جۇزەگە اسىرا باستادىق»، - دەدى تامارا دۇيسەنوۆا Jibek joly تەلەارناسىنىڭ ستۋدياسىندا.

ءمينيستردىڭ ايتۋىنشا، ۇلتتىق جوسپاردىڭ ءبىرىنشى كەزەڭى اياقتالدى.

«بۇگىن وسى كونۆەنتسياعا فاكۋلتاتيۆتىك حاتتاماعا قول قويا الامىز دەپ ويلايمىن. وسى ارقىلى ءبىز قازاقستانداعى مۇگەدەكتىگى بار جانداردىڭ قۇقىقتارىن قورعاۋ بولىگىندە حالىقارالىق ستاندارتتارعا بەرىك ەكەنىمىزدى، وسى ماقساتتارعا قول جەتكىزۋ ءۇشىن اشىق ەكەنىمىزدى ايتقىمىز كەلەدى. بۇۇ جانىنداعى مۇگەدەكتەردىڭ قۇقىقتارى جونىندەگى كوميتەت ەندى ءبىزدىڭ مۇگەدەكتەرىمىزدەن شاعىمداردى قابىلداۋعا، ولاردى قاراۋعا قۇقىلى جانە ولار كونۆەنتسيا ورىندالماي جاتىر دەپ ەسەپتەسە، بىزگە وسى شارالاردى جاقسارتۋ بويىنشا ءوز ۇسىنىستارىن بەرە الادى»، - دەپ اتاپ ءوتتى مينيستر.

«ءبىراق ب ۇ ۇ جانىنداعى كوميتەتكە شاعىم بەرەردە ادام الدىمەن وسى مەملەكەتتە ءتيىستى ينستانتسيالاردان ءوتۋى كەرەك، وعان دا قاناعاتتانباسا، بۇۇ كوميتەتىنە شاعىم بەرە الادى»، - دەپ ناقتىلادى ت. دۇيسەنوۆا.

سونداي-اق، بۇۇ جانىنداعى مۇگەدەكتەردىڭ قۇقىقتارى جونىندەگى كوميتەت كونۆەنتسيانىڭ ەرەجەلەرىن ورىندامادى دەپ تانىعان جاعدايدا، مۇگەدەكتىگى بار ادامنىڭ مورالدىق زالالدى ءوندىرىپ الۋعا قۇقىعى بار.