مينيسترلىك ءتورت تۇلىككە چيپ تاعىپ، ەسەپكە الۋدى ۇسىندى
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ءى ءى م تەرگەۋ دەپارتامەنتىنىڭ باسقارما باسشىسى ەرمەك شۇلدەن ايتتى، - دەپ حابارلايدى «استانا» تەلەارناسى.
«ەڭ وتكىر پروبلەمالاردىڭ ءبىرى - ەسىرتكىنىڭ جاڭا تۇرلەرىن شىعارۋ جانە ولاردى تىكەلەي بايلانىسسىز ساتۋ تاسىلدەرى ارقىلى جاسىرىن سيپات العان ەسىرتكى قىلمىسىمەن كۇرەس»، - دەدى ەرمەك شۇلدەن.
ونىڭ ايتۋىنشا، بۇل ماسەلەلەردى شەشۋ ءۇشىن مينيسترلىك مىنا باستامالاردى ۇسىنىپ وتىر:
مەكتەپتەردە جانە جوعارى وقۋ ورىندارىندا كامەلەتكە تولماعاندارعا سكرينينگ قولدانۋ ارقىلى ەسىرتكى پايدالانۋ دەرەكتەرىن ەرتە انىقتاۋ جۇيەسىن ەنگىزۋ؛
جەكە ەمحانا، جەدەل جاردەم، اۋرۋحانا، سونداي-اق، سالاۋاتتى ءومىر سالتى مەن ج ي ت س ورتالىقتارىن تارتا وتىرىپ، ناشاقورلاردىڭ شىنايى ەسەبىن شىعارۋ؛
سوت ساراپتاماسى ورگاندارىن ماتەريالدىق-تەحنيكالىق جاراقتاندىرۋ؛
كەدەن جانە شەكارا قىزمەتتەرى ورگاندارىن قازىرگى زامانعى ينسپەكتسيالىق جابدىقپەن جاراقتاندىرۋ.
«سونىمەن قاتار، بارلىق قىلمىستىڭ 90 پايىزى - ۇرلىق پەن مال ۇرلىعىنىڭ جاسالۋ سەبەپتەرى مەن شارتتارىن جويۋ شارالارى قابىلدانادى. اتاپ ايتقاندا، اۋىل شارۋاشىلىعى جانۋارلارىن چيپتەۋ نەگىزىندە مال باسىن ەسەپكە الۋدى ەنگىزۋ، يەسىز مالعا ارنالعان قورالار جاساۋ، ەت ونىمدەرىن وتكىزۋگە ارنالعان جاسىرىن ساۋدا ورىندارىن انىقتاۋ جانە جابۋ. بۇلاردان وزگە، بايلانىس وپەراتورلارىنىڭ ۇرلانعان موبيلدى قۇرىلعىلاردى بۇعاتتاۋ، ۇرلانعان زاتتاردى، اسىرەسە لومباردتاردا، كوميسسيالىق دۇكەندەردە ساتۋ ءتارتىبىن باقىلاۋ. مۇنىڭ بارلىعى سيفرلاندىرۋ، اۋىل شارۋاشىلىعى، ساۋدا مينيسترلىكتەرىمەن، بيزنەس قاۋىمداستىقپەن، ۇيالى بايلانىس وپەراتورلارىمەن جانە اكىمدىكتەرمەن ءوزارا ارەكەتتەسۋ بارىسىندا جۇزەگە اسىرىلادى»، - دەپ تۇيىندەدى ەرمەك شۇلدەن.
