قازاقستاندا تاعى ءبىر سالا ماماندارىنىڭ جالاقىسى وسەدى

استانا. قازاقپارات - تابيعات قورعاۋ مەكەمە قىزمەتكەرلەرىنىڭ جالاقىسى ەكى ەسە وسپەك، - دەپ حابارلايدى قازاقپارات ورمان شارۋاشىلىعى جانە جانۋارلار دۇنيەسى كوميتەتىنە سىلتەمە جاساپ.

2023-جىلعى 1- شىلدەدەن باستاپ ورمان جانە تابيعات قورعاۋ مەكەمەلەرى قىزمەتكەرلەرىنىڭ جالاقىسىنا 100 پايىز مولشەردە قوسىمشا اقى تاعايىندالادى.

ەسكە سالايىق، جالاقى كوتەرۋ ماسەلەسى ادامنىڭ دەنساۋلىعى مەن ومىرىنە زيان كەلتىرۋ قاۋپىمەن بايلانىستى جۇمىسكەرلەرگە، ياعني مەملەكەتتىك ورمان كۇزەتى قىزمەتى، تابيعات قورعاۋ مەكەمەلەرىنىڭ مەملەكەتتىك ينسپەكتورلارى جانە جانۋارلار دۇنيەسىن قورعاۋ جونىندەگى مامانداندىرىلعان ۇيىمداردىڭ ينسپەكتورلارىنا تاعايىندالعان بولاتىن.

سونىمەن قاتار، مينيسترلىك ورمان شارۋاشىلىعى قىزمەتكەرلەرىنىڭ جۇمىس بەرۋشىلەرى مەن كاسىپوداقتارىنىڭ وكىلدەرىمەن بىرلەسىپ، 2025-جىلعا دەيىن قوسالقى پەرسونال مەن تابيعات قورعاۋ ۇيىمدارىنىڭ شتاتتان تىس قىزمەتكەرلەرىنىڭ جالاقىسىن 2 ەسەگە ۇلعايتۋ بويىنشا شەشىم قابىلدادى (2023-جىلعى 1- شىلدەدەن باستاپ 70 پايىزعا، 2024-جىلعى 1- قاڭتاردان باستاپ 85 پايىزعا جانە 2025-جىلعى 1- قاڭتاردان باستاپ 100 پايىزعا).

وسىلايشا قارجى، ۇيىمداستىرۋ جانە وندىرىستىك-شارۋاشىلىق بولىمدەرىنىڭ قىزمەتكەرلەرىنىڭ، جۇرگىزۋشىلەردىڭ، تراكتوريستەردىڭ، وندىرىستىك جانە اكىمشىلىك ءۇي-جايلاردى تازالاۋشىلاردىڭ جانە ورماندى قالپىنا كەلتىرۋ، ورمان قورعاۋ جانە ورمان شارۋاشىلىعى جۇمىستارىمەن اينالىساتىن ۋاقىتشا جانە ماۋسىمدىق جۇمىسشىلاردىڭ جالاقىلارى وسپەك.