بيىل تاعى ءۇش مارشرۋتتاعى پويىزدا ايەلدەر ۆاگونى پايدا بولادى
بۇل جونىندە «جولاۋشىلار تاسىمالى» اكسيونەرلىك قوعامىنىڭ باس ديرەكتورى جانىبەك تايجانوۆ ب ا ق وكىلدەرىمەن وتكەن بريفينگىدە ايتتى.
«بىلتىردان بەرى ءجۇرىپ جاتقان ايەلدەر ۆاگونى جوباسىنا جولاۋشىلاردان جاقسى لەبىزدەر كوپ ءتۇسىپ جاتىر. ياعني، بەس باعىتتاعى پويىزداردىڭ قۇرامىندا تەك ايەل جىنىستىلارعا عانا قىزمەت كورسەتىپ، سولاردى عانا كىرگىزەتىن ۆاگوندار بولدى. وسى جوبا بىزدە وتە جاقسى ءجۇردى. جولاۋشىلاردان مۇنداي ۆاگونداردىڭ سانىن كەڭەيتسەڭىزدەر دەگەن ءوتىنىش- تىلەك كوپ ءتۇستى. بيىل سول جوبانى تاعى دا پيلوتتىق رەجيمدە جالعاستىرامىز»، - دەدى ول.
ايتۋىنشا، ايەلدەر ۆاگونى تاعى ءۇش مارشرۋتتىڭ پويىزدارىنا جالعانباق.
«تاعى ءۇش مارشرۋت قوسىلادى. بۇرىن الماتى- ماڭعىستاۋ، الماتى- وسكەمەن، پاۆلودار- تۇركىستان، ماڭعىستاۋ- سەمەي، اتىراۋ- استانا باعىتتارىنداعى پويىزداردا بولعان ەدى. بيىل جازدا استانا- الماتى، استانا- شىمكەنت، الماتى- اقتوبە باعىتتارىنداعى پويىزداردا ايەلدەرگە ارنالعان ۆاگوندار پايدا بولادى. بىلتىردان بەرى وسى ايەلدەرگە ارنالعان ۆاگوندارمەن 154 مىڭداي جولاۋشىنى تاسىمالدادىق»، - دەدى جانىبەك تايجانوۆ.
