ەلىمىزدە ونلاين كرەديتكە تىيىم سالىنادى
دەپۋتاتتىڭ سوزىنشە، «اقجول» پارتياسى دەپۋتاتتارى بۇعان دەيىن حالىقتىڭ ونلاين كرەديتتەر الۋ مۇمكىندىگىن بولدىرماۋدىڭ قاجەتتىگى تۋرالى ساۋال جولداعان.
مەملەكەت باسشىسى بىلتىر جەلتوقساندا ۇكىمەتتىڭ كەڭەيتىلگەن وتىرىسىندا حالىقتىڭ كوپ كرەديت الۋىن تومەندەتۋ ءۇشىن كەپىلسىز ونلاين ميكروكرەديت بەرۋگە تىيىم سالعان ەلدەردىڭ تاجىريبەسىن زەردەلەۋدى تاپسىردى. قالىپ وتىرعان كەلىسىم ەل ازاماتتارىنا قازاقستاندا وتىرىپ، باسقا مەملەكەتتىڭ اۋماعىنداعى قارجى ۇيىمىنان كرەديت الۋعا مۇمكىندىك بەرەدى. بۇدان باسقا، ەۋرازيالىق ەكونوميكالىق وداقتىڭ ونلاين قارىزدار بەرەتىن قارجى ۇيىمدارى قازاقستان نارىعىنا كىرەدى. ءبىز وسى سياقتى قارىزداردى الۋ وڭاي ەكەنىن بىلەمىز، - دەدى دەپۋتات.
ايتۋىنشا، قارىز الۋشىلاردىڭ تابىس دەڭگەيى مەن ولاردىڭ كرەديت تاريحى كوبىنە ەسكەرىلە بەرمەيدى. سونىڭ سالدارىنان بورىشكەرلەردىڭ كرەديتورلار الدىنداعى بورىشتىق مىندەتتەمەلەرىن ۋاقتىلى ورىنداماۋ سياقتى جاعدايلارعا تاپ بولامىز.
كەلىسىمدى راتيفيكاتسيالاۋ حالىقتىڭ كرەديتتى كوپ الۋىنا اكەپ سوقتىرماي ما؟ بۇگىنگى كۇنى ونلاين كرەديتتەردى تولىق الىپ تاستاۋ مۇمكىندىگىن قالاي باعالايسىز؟ - دەپ سۇرادى ەرجان بەيسەنبايەۆ قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆادان.
اگەنتتىك باسشىسىنىڭ ايتۋىنشا، كەلىسىم ترانسشەكارالىق الماسۋ ءتارتىبىن بەكىتەتىندىكتەن قۇجاتتى راتيفيكاتسيالاۋ حالىقتىڭ كرەديتتى كوپ الۋىنا اكەپ سوقتىرمايدى.
ول، سونىمەن قاتار، ونلاين كرەديت بەرۋ نارىعىن رەتتەۋ بويىنشا ءتۇسىندىرىپ ءوتتى.
ءبىز ءتيىستى وزگەرىستەردى دايىنداپ جاتىرمىز. ەندى پروبلەمالىق كرەديت بولسا، قارىز الۋشىعا جاڭا كرەديت الۋعا تىيىم سالۋعا وزگەرىستەردى دايىندادىق. ونى سىزدەردىڭ (دەپۋتاتتاردىڭ - رەد.) قاراۋلارىڭىزعا ەنگىزەمىز. ول وڭ ناتيجەسىن بەرەدى دەپ سەنەمىز، - دەپ ايتتى ول.
ءابىلقاسىموۆا قانداي وزگەرىس ەنگىزىلەتىنىن كۋلۋاردا قايتادان ءتۇسىندىرىپ بەردى.
ەگەر پروبلەمالىق كرەديتىڭىز بولسا، وندا جاڭا ونلاين ميكروكرەديت الۋعا تىيىم سالىنادى. سەبەبى كرەديت الۋشىلاردىڭ ءوسۋى نەگە بايلانىستى؟ مىسالى، ولاردىڭ بانكتە ءبىر پروبلەمالى كرەديتى بار. ءسويتىپ ونى جابۋ ءۇشىن ميكروقارجى ۇيىمىنا بارىپ، جاڭا كرەديت الادى. سول سەبەپتەن پروبلەمالىق كرەديت تۋىنداسا، جاڭا كرەديت بەرۋگە تىيىم سالۋعا ۇسىنىس ەنگىزدىك. سونىمەن ونىڭ بورىش جۇكتەمەسى وسپەيدى. بۇل وتە ماڭىزدى ماسەلە، - دەدى ءمادينا ءابىلقاسىموۆا ءماجىلىستىڭ كۋلۋارىندا.
بۇگىن ماجىلىستە قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى «ەۋرازيالىق ەكونوميكالىق وداق شەڭبەرىندە كرەديتتىك تاريحتىڭ قۇرامىنا كىرەتىن مالىمەتتەر الماسۋ ءتارتىبى تۋرالى كەلىسىمدى راتيفيكاتسيالاۋ تۋرالى» زاڭ جوباسىن تانىستىرعان بولاتىن.
