سىرقاتتاندىم دەپ جۇمىسقا بارماي، ارالدا دەمالعان قىتايلىق جۇمىستان قۋىلدى

استانا. قازاقپارات - قىتايدا تەحنولوگيالىق كومپانيالاردىڭ ءبىرىنىڭ قىزمەتكەرى «جۇمىسقا جارامسىزبىن» دەپ دەمالىس العانى ءۇشىن جۇمىستان بوساتىلدى.

ەمدەلۋدىڭ ورنىنا ەر ادام تروپيكالىق ارالدا دەمالعان، - دەپ حابارلايدى Tengritravel.kz ءتىلشىسى.

Business Insider مالىمەتىنشە، بەيجىڭ تۇرعىنى دەنساۋلىعىنا بايلانىستى ەكى اپتالىق دەمالىس الىپ، حاينان تروپيكالىق ارالىندا دەمالعان.

قىتايلىق National Business Daily باسىلىمىنىڭ مالىمەتىنشە، بارلىعى سوتتا سيۋ مىرزا دەپ اتالعان قىزمەتكەردىڭ تولەنەتىن ەكىاپتالىق ەڭبەك دەمالىسىنا شىعۋ تۋرالى ءوتىنىش بەرگەن، الايدا باسشىسى جۇمىس كۇشى قاجەتتىلىگىنە بايلانىستى ونى جىبەرمەي قويعان.

«سودان كەيىن سيۋ باسشىسىنا ومىرتقاسى اۋىراتىنىن ايتىپ، مەديتسينالىق قۇجات تاپسىرعان. وندا دارىگەر ناۋقاسقا جاتۋ كەرەكتىگى جانە موينىنا جاتتىعۋ جاساۋ كەرەكتىگى تۋرالى جازعان. باسشىلىق قىزمەتكەرىنىڭ ءوتىنىشىن قابىلداپ، تولەنەتىن ەڭبەك دەمالىسىنىڭ ورنىنا جۇمىسقا جارامسىزدىعى بويىنشا بوساتقان»، - دەپ جازادى باسىلىم.

دەرەككوز مالىمەتىنشە، ەر ادامدى حاينان اۋەجايىندا ارىپتەسى بايقاپ قالىپ، باسشىلىققا جەتكىزگەنىن ايتادى. باسشىلارىنىڭ سۇراعىنا جاۋاپ رەتىندە سيۋ بەيجىڭدەگى ۇيىندە بولعانىن جانە ەشقايدا بارماعانىن مالىمدەگەن.

«مەن سىزگە اۋىرعانىمدى جانە ساياحاتتاماعانىمدى مالىمدەيمىن. مەن ۇيدە جاتىپ ەمدەلدىم»، - دەيدى سيۋ.

الايدا، قىزمەتكەردىڭ لەزدە وتىرىگى شىعىپ، «الاياقتىق پەن ادىلەتسىزدىگى» ءۇشىن جۇمىستان شىعارىلدى.

«بۇعان جاۋاپ رەتىندە جۇمىستان بوساتىلعان قىزمەتكەر» ءوزىنىڭ بۇرىنعى جۇمىس بەرۋشىسىن الداماعانىن ايتىپ كەرى ارىز بەرگەن. ونىڭ ايتۋىنشا، حايناندا جەكە پاتەرى بولعان جانە دەمالۋ ءۇشىن ەمەس، اۋرۋدان ايىعۋ ءۇشىن ساۋىقتىرۋ ماقساتىندا ارالعا بارعان. بۇرىنعى جۇمىسشى مەن جۇمىس بەرۋشى اراسىنداعى قارىم-قاتىناستى ناقتىلاۋ ەڭبەك داۋىنا اكەپ سوققان»، - دەپ حابارلايدى باسىلىم.

الدىمەن ەڭبەك تريبۋنالى قىزمەتكەردىڭ ارەكەتى زاڭدى دەپ مويىنداپ، وعان قاتىستى ەڭبەك زاڭناماسىن بۇزىلعانى ءۇشىن 620 مىڭ يۋان (40 ميلليون تەڭگەدەن استام) وتەماقى تولەۋگە قاۋلى شىعارعان.

كومپانيا باسشىلىعى مۇنىمەن كەلىسپەي جوعارعى سوتقا شاعىم تۇسىرگەن، ول كەزدە وتەماقى تولەۋدى الىپ تاستاعان. جوعارعى سوت جۇمىس بەرۋشىنى وتەماقى تولەۋدەن بوساتقان، باستى سەبەپ: «سيۋ دارىگەردىڭ توسەكتەن تۇرماي جاتۋ كەرەك» دەگەن نۇسقاۋلىعىن ەسكەرمەۋى.

وسىلايشا، ەر ادام جۇمىسسىز، وتەماقىسىز قالعان. الايدا ول بۇعان دا شۇكىر دەۋىنە بولادى، ويتكەنى تۇركيادا جۇمىس ۋاقىتىندا «سىرقاتتاندىم» دەپ كۋرورتتا دەمالعان ەر ادام 15 جىلعا سوتتالۋى مۇمكىن دەگەن مالىمەت جاريالانعان ەدى.