اتىراۋدا تاعى ءبىر مۇناي كولشىگى انىقتالدى

اتىراۋ. قازاقپارات - ماحامبەت اۋدانىنا قاراستى سارى وسكەمباي جەرىندە مۇناي كولشىگى انىقتالدى، دەپ حابارلايدى قازاقپارات.

ماحامبەت اۋدانى اكىمى قايرات نۇرلىبايەۆ بۇل مۇناي اعىندىسىنىڭ ەسبول وكرۋگىنەن 40 شاقىرىم قاشىقتىقتا، دالادا ورىن العانىن راستادى.

«اق جايىق» باسىلىمىنىڭ ساۋالىنا وبلىستىق ەكولوگيا دەپارتامەنتى مىناداي جاۋاپ قايتارعان: «2021 -جىلدىڭ 13-تامىزىندا اۋداندىق پروكۋراتۋرا، اكىمشىلىك، پوليتسيا قىزمەتكەرلەرىمەن بىرلەسىپ، لاستانعان جەردى انىقتاپ جانە فوندىق توپىراقتان تالداما جاساۋعا سىنامالار الىنعان. ناتيجەسىندە توپىراق قۇرامىندا مۇناي ونىمدەرى كوپ مولشەردە ەكەنى بەلگىلى بولدى. بۇگىندە لاستانعان اۋماقتاعى جەر جانە ۇڭعىما مەملەكەت مەنشىگىندە».

سونىمەن قاتار، ۆەدومستۆو 2021-جىلى لاستانعان اۋماقتى تازالاۋ جانە قورشاۋ جونىندە حات جولداعان. وتكەن جىلى دا تازارتۋ جونىندە حات جىبەرىلگەن. الايدا مۇناي كولشىگى جويىلماعان. قازىرگى ۋاقىتتا اۋماقتى تازارتۋ شارالارى قولعا الىنۋدا.