وسكەمەننىڭ «التايى» ۆولەيبولدان ازيا كلۋبتىق چەمپيوناتىن جەڭىسپەن باستادى

استانا. قازاقپارات - وسكەمەننىڭ «التايى» ۆەتنامدا (ۆينفۋك) ۆولەيبولدان ءوتىپ جاتقان ازيا كلۋبتىق چەمپيوناتىن جەڭىسپەن باستادى، دەپ حابارلايدى قازاقپارات ءتىلشىسى.

قازاقستان چەمپيونى قۇرلىقتىق دودادا «ۆ» توبىندا «Liaoning Donghua VC» (قىتاي) ، «Diamond Food Fine-Chef Sport Club» (تايلاند) ، «Khuvsgul Erchim VC» (موڭعوليا) ، «Hip Hing VB Club» (گونكونگ) كوماندالارىمەن باق سىنايدى.

يۋريي پانچەنكو جاتتىقتىراتىن وسكەمەندىك ارۋلار (كوماندا كاپيتانى، ورال ۆولەيبولىنىڭ تۇلەگى سانا انارقۇلوۆا) العاشقى ويىنىن ءوز توبىنداعى مىقتىلاردىڭ ءبىرى تايلاندتىڭ «Diamond Food Fine-Chef Sport Club» كلۋبىمەن وتكىزدى.

وتكەن جىلى سەمەيدە «التاي» ءدال وسى كوماندانى توپتىق باسەكەدە 3:0 ەسەبىمەن تىزە بۇكتىرگەن ەدى.

بۇل جولى ماتچ مۇلدە وزگەشە ءوربىدى. العاشقى ەكى پارتيادا تايلىق كلۋب 25:21, 25:19 ەسەبىمەن باسىم ءتۇستى. وسكەمەندىكتەرگە جەڭىلىپ قالۋ ءقاۋپى ءتوندى. دەگەنمەن يۋ. پانچەنكو ويىنشىلاردى الماستىرىپ، باسەكەگە تىڭ سەرپىن قوسا ءبىلدى. بۇدان كەيىن قازاقستاندىقتار 25:22, 25:14, 15:11 ەسەبىمەن بەس پارتيادا جەڭىسكە قول جەتكىزدى. وسىلايشا، باستاپقى ەكى ۇپايىنا يە بولدى. ەرتەڭ يۋ. پانچەنكو شاكىرتتەرى موڭعوليالىق كلۋبپەن الاڭعا شىعادى.

قازاقستان ۆولەيبول فەدەراتسياسىنان الىنعان مالىمەتكە قاراعاندا، «التاي» وسىعان دەيىن كلۋبتىق ازيا چەمپيوناتىنا التى مارتە قاتىسىپ، سونىڭ ەكەۋىندە جەڭىمپاز اتانىپ، ءبىر رەت قولا جۇلدەنى قاناعات تۇتقان ەدى.

ۆەتنامداعى دودانىڭ توپتىق كەزەڭى بەس كۇنگە سوزىلادى. ءوز توپتارىندا ءبىرىنشى جانە ەكىنشى ورىن العان كلۋبتار جارتىلاي فينالعا شىعادى. ال قالعان بەس كوماندا 5-9 ورىنداردى ساراپقا سالاتىن بولادى. فينال مەن ءۇشىنشى ورىن ءۇشىن وتەتىن ماتچ 2 مامىرعا جوسپارلانعان.

ەسكە سالا كەتەيىك، بۇدان بۇرىن «التاي» كومانداسىنىڭ قاتارىنان جەتىنشى رەت قازاقستان چەمپيونى اتانعانىن جازعان بولاتىنبىز.